लमजुङ, ८ पुस – गीतकार किरण बरालले आफ्नै शब्द, संगीत र आवाजमा ‘यौटा फूल’ शीर्षकको गीतको म्युजिक भिडियो सार्वजनिक गरेका छन् । युट्युवमार्फत बिहीबार सार्वजनिक गरिएको उक्त गीतमा उनले पहिलो पटक स्वर भरेका छन् । निकेश खड्काले निर्देशन गरेको भिडियोलाई बुद्ध थापाले छायांकन र निशान घिमिरेले सम्पादन गरेका हुन् । संगीत संयोजन आशिष अविरलले गरेका छन् ।
बरालको दोस्रो गीतिसंग्रह सिम्रिकको पहिलो गीतको उक्त म्युजिक भिडियोमा केकी अधिकारी र अमृत रिमालले अभिनय गरेका छन् । भिडियोमा केकी र अमृतले पतिपत्निको भूमिका निर्वाह गरेका छन् । पतिपत्निबीचको सम्बन्धविच्छेदको कथावस्तुमा भिडियो तयार पारिएको बरालले बताए । उनका अनुसार आफूसँगै रहेको ब्यक्ति छुटेर जाँदा पीडा भए पनि सधैं पीडा बोकेर बस्नु हुन्न भन्ने भाग गीतमा समेटिएको छ ।
पिपुल टु पिपुल मिडियाले उत्पादन गरेको भिडियो हाइलाइट्स नेपालको युट्युब च्यानलमार्फत सार्वजनिक भएको हो । सिम्रिक एल्बमको बजार व्यवस्थापन रास क्रियसनले गरेको उनले बताए । बेंसीसहर नगरपालिका ५ भकुन्डेमा घर भएका उनी हाल नेपाल बैंक लिमिटेड कान्तिपथ काठमाडौंमा कार्यरत छन् ।
Previous Articleलिवियाली विमान: अपहरणकारीले आत्मसमर्पण गरे
Next Article पर्यटनका लागि ‘नेपाल फर अल सिजन’