असार १५ अर्थात् २१ औं राष्ट्रिय धान दिवस-२०८१ तथा रोपाइँ महोत्सवको अवसरमा नेकपा एमाले जिल्ला कमिटी म्याग्दीले किसानको खेतमा गएर सामुहिक धान रोपाई गरेको छ । असार १५ गते अर्थात् राष्ट्रिय धान दिवसको अवसर पारेर शनिबार पश्चिम म्याग्दीको मंगला गाउँपालिका–३ सिम्कुनामा नेकपा एमालेकाे अगुवाइमा एमाले नेता कार्यकर्ता तथा शुभचिन्तकहरुले एक बृद्ध किसानको खेतमा धान रोपाइ गरेका हुन् । जनशक्तिको अभावका कारण रोपाइ गर्न अन्यौलको अवस्थामा पुग्नु भएका ७० बर्षिय कृषक खड्क बहादुर रोकाको खेतमा एमालेले धान रोपेको हो । रोकाको करिव १० मूरी धान फल्ने खेतमा रोपाइ गरिएको एमाले म्याग्दीका अध्यक्ष बालकृष्ण सुबेदीले बताउनुभयो ।
‘कृषकको खेतमै पुगेर रोपाइमा सहभागी भएका छौ, किसानका हरेक समस्या समाधान गर्न हामी प्रतिबद्ध छौ’अध्यक्ष सुबेदीले भन्नुभयो। ग्रामिण क्षेत्रमा कृषि पेशामा संलग्न भएका बृद्धबृद्धाहरु समस्यामा पर्न सक्ने भएकाले श्रमदान सहितका रचनात्मक कार्यलाई निरन्तरता दिने अध्यक्ष सुबेदीको भनाई छ। माना मुरी धान फल्ने फाँटका रुपमा चिनिने यस क्षेत्रमा पछिल्लो समय कृषकले खेताला समेत नपाउने अवस्थामा समेत रहेको एमाले मंगला गाउँपालिका कमिटीका अध्यक्ष याम थापाले बताउनुभयो।
रोपाइ श्रमदानमा एमालेको केन्द्रिय सदस्य एवम् एमाले म्याग्दीको पालिका इन्चार्ज नरदेवी पुन,एमाले म्याग्दीकी सचिव थमसरा पुन, उपसचिव एवम् मंगला गाउँपालिका अध्यक्ष सतप्रसाद रोकाले धानको उत्पादन वृद्धि,आधुनिकिकरण र व्यवसायीकरणलाई प्रवद्र्धनमा प्रतिबद्ध रहेको बताउनुभएको थियो । मंगला गाउँपालिका जिल्लाकै सबैभन्दा बढी धान उत्पादन हुने मध्येमा पर्छ । यो वर्ष जलवायुमैत्री कृषि,धान उत्पादनमा वृद्धि भन्ने नाराका सहित विभिन्न कार्यक्रम गरी धान दिवस मनाइएको छ ।
