तिम्ल्याह बच्चा पालनपोषणमा बेनपाको सहयोग

बेनी नगरपालिकाले मङ्गलबार तिम्ल्याह बच्चाको पालनपोषणका लागि आर्थिक सहयोग गरेको छ । बेनी नगरपालिका–४, राक्से र ७ मङ्गलाघाटका दुई परिवारका तिम्ल्याह बच्चाको पालनपोषणमा सघाउन नगरपालिकाले आर्थिक सहयोग गरेको हो ।
बेनी नगरपालिकाका प्रमुख हरिकुमार श्रेष्ठ, उपप्रमुख सञ्जु बरुवाल, प्रमुख प्रशासकीय अधिकृत छविलाल सुवेदी र प्रवक्ता तथा वडानम्बर ८ का वडा अध्यक्ष रामकृष्ण बराईलीले आर्थिक सहयोग हस्तान्तरण गरेका थिए । उनीहरुले तिम्ल्याह बच्चाका अभिभावक मङ्गलाघाटका सम्झना पन्त बानियाँ र राक्सेका केदार आचार्यलाई जनही ३० हजार रुपैयाँका दरले सहयोग हस्तान्तरण गरेका हुन् ।
नगर कार्यपालिकाको यसअघि सम्पन्न ३१औं कार्यपालिका बैठकमा भएको निर्णय अनुसार दुई परिवारका तिम्ल्याह बालबालिकाहरुको पालनपोषणमा सहयोग पु¥याउन उक्त रकम हस्तान्तरण गरिएको प्रमुख प्रशासकीय अधिकृत सुवेदीले जानकारी दिए ।
आर्थिक अभावका कारण तिम्ल्याह बालबालिकाको पालनपोषणमा समस्या परेको थियो । राक्सेकी सुनिताको एक बच्चाको उपचारका लागि अहिलेसम्म २३ लाख रुपैयाँ खर्च भैसकेको छ । आर्थिक समस्याका कारण पालपोषणमा सकस भएको आचार्य परिवारले बताएका छन् ।