स्वतन्त्र संसद

अहिले देशमा केही कुराहरु चर्चामा छन् । त्यस मध्ये पहिलो हो डाक्टर केसीको आन्दोलन अर्थात् अनसन, त्यस पछि अर्को उनकै विरुद्धमाा भएको अनसन र कांग्रेसको संसद अवरोध । सबैको प्रकृति हेर्दा सबै कुराहरु एकै विन्दुमा पुगेर अड्किन्छन् । अर्थोपोडिक डाक्टर गोविन्द केसीले चिकित्सा क्षेत्रमा सुधार भनेका छन् भने उनका विरुद्धमा अर्का अनसनकारीले भने चिकित्सा क्षेत्र साहुकारी भयो र नेपाली जनताले चिकित्सा शिक्षा नेपालमै पढ्न पाउनु पर्छ भन्दै छन् । दुबैको माग चिकित्सा क्षेत्रकै छ । तेस्रो – कांग्रेसले गरेको संसद् अवरोध पनि त्यही नेरोफेरोमा घुम्दै छ । किन भने कांग्रेसले पनि सुशील कोइराला र गिरिजाप्रसाद कोइरालाको नाउँमा स्थापना हुनु पर्ने संस्थाहरु संघीय सरकार मातहत राख्दै काम अगाडि बढाउनु पर्ने बताइ रहेका छन् ।
नेपाली शब्दकोषमा विभिन्न शब्दहरु र नेपाली व्याकरणमा हुने धेरै शब्दहरु हुन्छन् र त्यसका पनि धेरै अर्थ लाग्छन् । नेपाली व्याकरणका अनुसार उस्तै अर्थ लाग्ने शब्दलाई पर्यायवाची शब्द पनि भनिन्छ । अहिले नेपाली समाजका केहीले अर्थोपेडिक डाक्टर गोविन्द केसीलाई अनसनको प्रर्यायवाची भन्न थालेका छन् । उनले अहिलेसँग गरेर १६ पटक अनसन बसी सके । डा. केसीको समर्थनमा आवाज बुलन्द गर्नेहरु एकातिर छन्भने अर्कोतिर उनी अब अनसन बसेनन् भने पनि सायद बिरामी पर्ने पो हुन् कि भन्दै उनको खिल्ली उडाउनेहरुको जमात पनि बढ्दो छ । अहिले उनी अनसन बसेकै समयमा बिरामी परेकाले उनलाई टिचिङ हस्पिटलमा भर्ना गरिएको छ । स्वास्थ्य स्थिति नाजुक बन्दै गएपछि उनलाई टिचिङमा भर्ना गरिएको हो । उनको आफ्नै हठ अनि उनले सोचेको जस्तो कानुन संसदले बनाउन पर्ने माग उनको ठिक होला नहोला सबैले सोच्न पर्ने विषय पनि हो । उनै के.सी.को मागलाई आफ्नो माग भन्दै कांग्रेसले पनि आन्दोलन चर्काउने भन्दै उफ्रने पनि गर्दछ । डा. केसीको मागलाई कांग्रेसले आफ्नो माग बनाउने र उनको माग पूरा गराउन संसदमा दबाब दिँदा उनको सत्याग्रहलाई राजनीतिक रङ दिने काम भएको मान्न सकिन्छ ।
अर्का अनसनकारी विजय थापाको माग केसीको भन्दा केही फरक भए पनि चिकित्सा क्षेत्रसँगै जोडिएको छ । अहिले संसद अवरोध गरेर कांग्रेसले पनि जिपी कोइराला र सुशील कोइरालाको नाममा स्थापना हुने शिक्षण संस्थाहरुको बारेमा यथार्थ चाहियो भन्दै संसद अवरुद्ध गरेर पनि चिकित्सा क्षेत्रकै माग राखेको छ । यसले के देखायो भने सबैले आ–आफ्नै मागलाई माथि राख्ने र उत्कृष्ट मान्ने कारणले गर्दा अहिलेको अवस्थामा समस्या देखाउने अनि चर्चा कमाउने माध्यम बनेको छ । राज्यमा विधिको शासन र विधिको राज हुनै पर्छ, त्यसका लागि सबैले विधि र विधान अनि नियम कानुन मान्नै पर्छ । जसरी पनि देशको पक्षमा काम गर्नु पर्छ भन्ने हेक्का सबैले राख्न जरुरी छ र त्यसका लागि सबैले राज्यको सर्वोच्च संस्था संसदलाई उसको जिम्मेवारीका साथ काम गर्ने वातावरण दिनुपर्छ । संसदलाई कसैले बन्धक बनाउने प्रयास गर्नु हुँदैन र संसद पनि बन्धक बन्नु हुँदैन ।