जनप्रियले मनायो ६७औं वार्षिकोत्सव

पश्चिम म्याग्दीको मालिका गाउँपालिका–६, दरबाङमा रहेको जनप्रिय माध्यमिक विद्यालयले आइतबार विभिन्न कार्यक्रमको आयोजना गरेर ६७औं वार्षिकोत्सव तथा अभिभावक दिवस मनाएको छ । विद्यालय परिसरमा समारोह, सांस्कृतिक र पुरस्कार वितरण कार्यक्रमको आयोजना गरेर वार्षिकोत्सव मनाइएको हो ।
वार्षिकोत्सव कार्यक्रमलाई सम्बोधन गर्दै मालिका गाउँपालिकाका अध्यक्ष श्रीप्रसाद रोकाले गाउँपालिकाको सामुदायिक विद्यालयको शैक्षिक गुणस्तरलाई वृद्धि गर्नुपर्ने र जनप्रिय माविको पढाई अझै प्रभावकारी तरिकाले अगाडि बढाउनुपर्ने बताए । उनले गाउँपालिकामा निजी विद्यालयहरु बढ्दै गैरहेका बेला सामुदायिक विद्यालयहरुले पनि शैक्षिक गुणस्तरलाई प्रभावकारी बनाउनुपर्नेमा जोड दिएका छन् ।
मालिका–६, दरबाङका वडा अध्यक्ष सन्तनाथ सुवेदीले विद्यालयको शैक्षिक गुणस्तर सुधारका लागि विद्यालयले कार्ययोजना बनाएर अघि बढ्नुपर्ने बताए । कार्यक्रममा २०७५ को बोर्ड परीक्षामा व्यवस्थापन सङ्कायमा म्याग्दी जिल्ला प्रथम हुन सफल कुलदेवी पुन र कृष्ण सापकोटालाई सम्मान गरिएको थियो ।
यसैगरी एसइईमा शतप्रतिशत उत्तीर्ण गराउन सफल हुने विषयगत शिक्षक दिवाकर सुवेदी, नगेन्द्र खत्री, बालकृष्ण शर्मा, कृष्णप्रसाद रेग्मी, ईमरान खान र जगतकुमार सापकोटालाई सम्मान गरिएको थियो । त्यस्तै तहगतमा लक्ष्मी पौडेल सुवेदी, रेशम नेपाली र नारायणप्रसाद सापकोटालाई सम्मान गरिएको विद्यालयका प्रधानाध्यापक दिवाकर सुवेदीले जानकारी दिएका छन् ।