आजदेखि शिद्धबाबामा महायज्ञ सञ्चालन

पर्वतको जलजला–२, बगरफाँटस्थित शिद्धबाबा आधरभूत विद्यालयमा आजदेखि सुरु हुने महायज्ञको सबै तयारी पुरा भएको आयोजकले जनाएको छ । महायज्ञको राष्ट्रियसभाका अध्यक्ष गणेशप्रसाद तिमिल्सिनाले उद्घाटन गर्ने कार्यक्रम तय गरिएको महयज्ञका प्रचाप्रसार संयोजक कृष्ण जिसीले जानकारी दिए ।
विद्यालयलाई आर्थिक स्रोत जुटाउन महायज्ञ गर्न लागिएको हो । विद्यार्थी सङ्ख्या घटेपछि २०६८ सालमा पर्वत बेनीस्थित रहेको बेनी आधारभूत विद्यालयसँग गाभिएपछि विद्यालय बन्द भएको थियो । २०७४ मा पुनः सञ्चालनमा आएको विद्यालयमा ४१ जना अध्यनरत छन् । पछिल्लो समय बगरफाँटमा बसोबास गर्ने जनसङ्ख्यामा वृद्धि भएसँगै विद्यालयको आवश्यकता महशुस गरी २०७४ बाट विद्यालय पुनः सञ्चालन गरिएको संयोजक जिसीले बताए ।
अहिले बाल कक्षादेखि १ कक्षासम्म पठनपाठन हुँदै आएको छ । विद्यालयको भौतिक अवस्था जिर्ण हुनुका साथै शिक्षकहरुलाई तलब खुबाउन पनि समस्या भएपछि महायज्ञको आयोजना गरिएको विद्यालय व्यवस्थापन समितिका अध्यक्ष तथा महायज्ञ आयोजक समितिका मूल संयोजक हिराबहादुर बरुवालले बताए । महायज्ञमार्फत सहयोग सङ्कलन गरेर विद्यालय सञ्चालन गर्ने लक्ष्य रहेको उनले बताए ।
पण्डित कमलनयन गौतमले कथावाचन गर्ने धनधान्याञ्चल ज्ञान महायज्ञमा ९० लाख रुपैयाँ भन्दाबढी सङ्कलन गर्ने उद्देश्य रहेको महायज्ञका आर्थिक संयोजक भगवती शर्माको भनाइ छ । महायज्ञको हालसम्म प्रचारप्रसार, विद्यालय प्राङ्गरणमा आवश्यक पूर्वाधार निर्माण, अतिथि व्यवस्थापन लगायतका तयारीहरु पुरा भएको संयोजक जिसीले जानकारी दिए ।
महायज्ञबाट सङ्कलन हुने रकमबाट भौतिक पूर्वाधारको स्तरोन्नति, प्रत्येक वर्ष कक्षा थप, अग्रेजी तथा नेपाली माध्यमबाट पठपाठन, कम्प्युटर शिक्षा, आधुनिक पुस्तकालय, स्वच्छ वातावरणमा पठनपाठन निर्माणका लागि खर्च गरिने समितिका सचिव मुकुन्द बैरागीले बताए । विद्यालयमा कार्यरत ३ जना शिक्षकलाई निजी स्रोतबाट पारिश्रमिकको व्यवस्था गरिएको छ ।