म्याग्दी जिल्लामा बसोबास गर्दै आइरहेका गुरुङ समुदायले आइतबार आफ्नो महान् पर्व तमु ल्होसार विभिन्न कार्यक्रमहरु आयोजना गरेर मनाएका छन् । बेनी नगरपालिका–४, थामडाँडामा बसोवास गर्ने तमु समुदायले नयाँ वर्षका रुपमा मान्ने पुस १५ धुमधामका साथ मनाएका हुन् ।
तमु प्ये, ल्हु संघ म्याग्दीको आयोजनामा विविध कार्यक्रमका साथ ल्होसार मनाइएको छ । आफ्नो संस्कृतिलाई जोगाइराख्ने र पुस्तान्तरण गर्ने मूल उद्देश्यसहित कार्यक्रम आयोजना गरिएको तमु प्ये, ल्हु संघ इकाई कार्यसमिति म्याग्दीका अध्यक्ष लिला गुरुङले बताए । ल्होसारको अवसर पारेर थामडाँडामा आयोजना गरिएको आर्चरी प्रतियोगितामा बेनी पहिलो भएको थियो भने दोस्रो स्थान कुहुँले कब्जा जमाएको तमु प्ये, ल्हु संघ म्याग्दीका सदस्य राजु गुरुङले जानकारी दिए ।
यसैगरी पश्चिम म्याग्दीको मालिका गाउपालिका–६, दरबाङस्थित ढाँडखर्कमा पनि तमु ल्होसार पर्व मनाइएको छ । तमु ह्यु छोझधि गुरुङ इकाई समिति दरबाङ ढाँडखर्कको आयोजनामा कार्यक्रम गरिएको हो । कार्यक्रमलाई सम्बोधन गर्दै मालिका गाउँपालिकाका अध्यक्ष श्रीप्रसाद रोकाले जाति, भाषा र संस्कृतिको उत्थानमा लाग्नुपर्ने बताएका छन् । उनले मौलिक कला र संस्कृतिलाई जोगाउनुपर्ने बताउँदै आफ्नो पहिचानका लागि सबै एक भएर लाग्नुपर्ने बताए । तमु ल्हु छोझधि का केन्द्रीय सदस्य चेतबहादुर तमुले तमु ल्होसार पर्वको विदा सरकारले कटौती गरेकोमा दुःख व्यक्त गर्दै राष्ट्रको विकासमा गुरुङ समुदायको पनि योगदान रहेको चर्चा गरेका थिए ।
कार्यक्रममा तमु सेवा समाज जिल्ला कार्यसमिति म्याग्दीका वरिष्ठ उपाध्यक्ष तथा गण्डकी प्रदेश सदस्य विष्णु गुरुङ, लामागुरु कुलबहादुर गुरुङ र दरबाङका वडा अध्यक्ष सन्तनाथ सुवेदीले मन्तव्य राखेका थिए । औपचारिक कार्यक्रम सुरु हुनुपूर्व गुरुङ समुदायले ¥यालीसहित भेषभूषा प्रदर्शनी गरेका थिए । कार्यक्रममा गुरुङ संस्कृति झल्कने गीतसङ्गीत र नृत्य प्रस्तुत गरिएको थियो ।
कार्यक्रम तमु सेवा समाज राष्ट्रिय परिषद जिल्ला कार्यसमितिका अध्यक्ष चक्रबहादुर गुरुङको अध्यक्षता, गुरुङ समुदायको विद्यार्थी सङ्गठन गण्डकी प्रदेशका सचिव नेत्र गुरुङको सञ्चालन र दरबाङ ढाँडखर्क इकाई कार्यसमिति अध्यक्ष सुनमाया गुरुङको स्वागतमा सम्पन्न भएको थियो । म्याग्दीको दाना, नारच्याङ, भूरुङ–तातोपानी, बास्कुना, थामडाँडा, दरबाङ, ढाँडखर्क, तोलाबाङ, गोगनपानी लगायतका ठाउँमा गुरुङ समुदायको बसोबास रहेको छ । ल्होसार पर्व नयाँ वर्ष उत्सवको रुपमा पनि रहेको छ ।
यसैबीच गुरुङ समुदायको मुख्य पर्व ल्होसार पर्वको अवसरमा आइतबारको दिन गण्डकी प्रदेश सरकारले सार्वजनिक विदा दिएको सूचना जारी गरेपनि म्याग्दीमा भने सरकारी कार्यालय, बैंक तथा वित्तीय संघसंस्थालगायत खुलेका थिए । प्रदेश सरकारले विदा दिएको भए पनि सङ्घीय सरकार अन्तर्गत रहेका सरकारी कार्यालयहरु खोलिएको थियो ।
