म्याग्दीको सदरमुकाम बेनीमा रहेको लिटिल गार्डेन एकेडेमीको आयोजनामा जिल्लास्तरीय अन्तरमावि म्याराथुन प्रतियोगिता सम्पन्न भएको छ । विद्यालयको वार्षिक कार्यक्रम अन्तरगत आयोजित ८ किलोमिटरको मिनी म्याराथुन प्रतियोगितामा छात्रतर्फ राष्ट्रिय मावि नेप्टेचौरका आर्य खत्रीले (२६ मिनेट)मा पुरा गरी च्याम्पियन भएका छन् ।
यसैगरी माउण्ट एभरेष्ट आवासीय माविका नवीन रोका, मंगला मावि बाबियाचौरका महेन्द्र पुन क्रमशः दोस्रो र तेस्रो भएका थिए । रोकाले (२७ मिनेट) र पुनले (२७ मिनेट ५० सकेण्डमा)मा लक्ष्य पुरा गरेका थिए । त्यस्तै छात्रातर्फ जनकल्याण मावि पुलाचौरका करुणा बानियाँले ३१ मिनेटमा लक्ष्य पुरा गरेकी थिइन् ।
उनलाई पच्छ्याउँदै बेनी सामुदायिककी सोनिया बरुवालले ३३ मिनेट र गलेश्वर आदर्श माविका डिम्पल गुरुङले ३५ मिनेटमा दौड पुरा गरेको विद्यालयका प्रिन्सिपल खुमबहादुर केसीले जानकारी दिए । बेनीदेखि धार्मिकस्थल गलेश्वरसम्मको रुटमा धावकको सुरक्षालाई समेत ध्यान दिएर ट्राफिक प्रहरीको सहज व्यवस्थापनमा प्रतियोगिता सञ्चालन गरिएको उनले बताए ।
विद्यालयले दिएका जानकारी अनुसार प्रतियोगितामा जिल्लाभित्रका निजी तथा सामुदायिक गरी १२ विद्यालयका ११ छात्र र ११ छात्राले सहभागिता जनाएका थिए । प्रतियोगिताको उद्घाटन गर्दै जिल्ला खेलकुद विकास समितिका अध्यक्ष कृष्णकुमार विश्वकर्माले मिनी म्याराथुन प्रतियोगिताले खेलकुदको क्षेत्रमा लोकप्रिय रहेको बताए । कार्यक्रममा स्रोतव्यक्ति मोहन बानियाँ र विद्यालयका संस्थापक÷निर्देशक बालकृष्ण सुबेदीले मन्तव्य राखेका थिए ।
