बागलुङ, १० असोज – धौलागिरी बहुमुखी क्याम्पसको समाजशाष्त्र मानवशाष्त्र विभागले मुस्ताङको पहिचान र म्याग्दी राम्चेको नागिगाउँ नामक पुस्तक प्रकाशित गरेको छ ।
सामाजशाष्त्रिय अध्ययन अनुसन्धान मार्फत तयार पारिएको यो पुस्तकमा दुवै जिल्लाको भौगोलिक अवस्था, समाजको बनौट, कला संस्कृति र सामाजिक रहनसहन तथा त्यसबाट सिक्नुपर्ने शिक्षाको बारेमा प्रष्ट पारिएको छ । विभागले स्नातक तहको तेस्रो बर्षमा अध्ययनरत विद्यार्थीको अध्ययन भ्रमण मार्फत ल्याएको प्राथमिक तथ्यांक र यस अघिका प्रकाशित कृतिको तथ्यांक समेत राखेर पुस्तक आकार दिइएको विभागीय प्रमुख विश्वबन्धु अधिकारीले बताए ।
‘सामाजिक जनजीवन, कृषि, ग्रामीण पर्यटन, त्यहाँ संचालित होमस्टे र त्यसले समाजमा ल्याएको आर्थिक सुधार बारेमा पनि प्रष्ट पार्ने प्रयास गरिएको छ’ अधिकारीले भने, ‘विद्यार्थीलाइ अध्ययनशिल र लेखनकलामा समेत व्यहारिक ज्ञान दिनका लागि भ्रमणको उपलब्धी प्रकाशन गरिएको हो ।’ २०६६ सालमा स्नातक तहमा पनि समाजशाष्त्र मानवशाष्त्रको पढाइ शुरु भएपछि हरेक बर्ष विद्यार्थीलाइ एक/एक स्थानमा भ्रमण गराएर प्रतिवेदनमुलक पुस्तक प्रकाशित गरिएको समेत उनले बताए । पहिलो पटकका विद्यार्थीले उपल्लो मुस्ताङको बहुपति प्रथा, दोश्रोपटक घोडेपानीको पर्यटन, तेस्रोपटक ढोरपाटनको जैविक विविधता, त्यसपछि लमजुङको घलेगाउँ, दामनका वनकरिया जाती, इलामको लाप्चा जातीको अध्ययन गरिसकेका छन् ।
पुस्तकको बिमोचन गर्दै निमित्त प्रमुख धु्रवराज गौतमले विदार्थीहरुलाइ अध्ययन अनुसन्धानमा लगाएर व्यबहारिक ज्ञान दिने प्रयास गरिएको बताए । उच्च शिक्षाको अध्ययन गरिसकेका विद्यार्थीले व्यहारिक ज्ञान नपाएमा रोजगारी पाउन मुस्किल हुने समेत उनले धारणा राखेका थिए । कार्यक्रममा पूर्व क्याम्पस प्रमुख आनन्दराज सिलवाल, गोविन्दराज गौतम, विभागीय प्रमुख विश्वबन्धु अधिकारी, सहप्राध्यापक सुर्दशन सिलवाल, त्रिवि कर्मचारी संघका सचिव भूपाल चालिसे, नेविसंघका बालकृष्ण शर्मा, अनेरास्ववियु क्रान्तिकारीका जीवन शर्मा लगायतले मन्तव्य राखेका थिए । भ्रमणटोलीका संयोजक विदुर खरेलको अध्यक्षता युनिसा थापाको संचालनमा कार्यक्रम सम्पन्न भएको थियो । हाल अध्ययनरत तेस्रो बर्षका विद्यार्थी भने लमजुङको भुजुङ गाउँ जाने तय भएको छ । उनीहरुले त्यहाँपनि सामाजिक जनजीवन र ग्रामीण पर्यटन बारे अध्ययन गर्ने बताइएको छ ।
