११ औं बहिरा दिवस मनाईयो

बागलुङ, १० असोज – एघारौ अन्तराष्ट्रिय बहिरा दिवश आइतवार विभिन्न कार्यक्रम गरी मनाइएको छ ।
बागलुङ बहिरा संघ तथा धौलागिरी बहिरा आवासीय माविको संयुक्त आयोजनामा दिवश मनाइएको हो । दिवशको अवसरमा बहिराहरुले सवारी साधनको लाइसेन्स तथा अन्य सेवा सुविधामा अन्य मानिस सरह सेवा दिन माग गरेका थिए । साथै अपांग परिचयपत्र नियमित दिनुपर्ने, परिचयपत्रको आधारमा राज्यका विभिन्न निकायमा सेवा सुविधा पाउनुपर्ने धारणा पनि राखे ।
कार्यक्रममा निमित्त महिला विकास अधिकृत सरस्वती देवी रेग्मीले अपांगता भएकाहरुलाइ सबैले अवसर दिएमा सामान्य नागरिक जस्तै उनीहरुले सफलता पाउन सक्ने धारणा राखिन् । उनले जिल्लाका सबै सरकारी कार्यालयले पनि समान अवसर सिर्जना गर्नुपर्ने बताइन् ।
बागलुङ बहिरा संघका अध्यक्ष सन्तोष पौडेलको अध्यक्षता, सचिव लवकुश शर्मा र दोभासे मिरा विष्टको संचालन तथा उपाध्यक्ष अमृत शर्माको स्वागतमा सम्पन्न कार्यक्रममा धौलागिरी बहिरा माविका संस्थापक केवी राना, बागलुङ बहिरा संघका संस्थापक बसन्तजंग राजभण्डारी, विद्यालयका प्रअ मधुसुदन निउरे लगायतले बोलेका थिए । उक्त अवसरमा विद्यार्थीहरुले तेक्वान्दो, कराते लगायतका खेल र राष्ट्रिय भावका गीतमा नृत्य प्रस्तुत गरेका थिए ।