पवित्र तिर्थस्थल गलेश्वर धामको मातृ संस्था गलेश्वर शिवालय क्षेत्र विकास कोषको अध्यक्षमा पुनः माधवप्रसाद रेग्मी अध्यक्षमा चयन हुनुभएको छ ।
बेनी जोमसोम सडक खण्ड अन्तरगत बेनी नगरपालिका–९, गलेश्वरमा अवस्थीत गलेश्वर महादेव मन्दिर व्यवस्थापन गर्ने मातृ संस्था गलेश्वर शिवालय क्षेत्र विकास कोषको शनिबार सम्पन्न ८ औं अधिवेशन तथा १९ औं कार्यकारी सभाबाट रेग्मीको नेतृत्वमा नयाँ समिति चयन भएको हो ।
नयाँ निर्वाचित समितिको उपाध्यक्ष बम बहादुर पुन, कोषाध्यक्ष कुमारी रोका रहनुभएको छ । त्यसैगरी सदस्यहरूमा पुर्ण बहादुर बानियाँ, रमेश प्रसाद सुबेदी, धन प्रसाद रोका, पुण्य बहादुर चोखाल, टेक बहादुर बानियाँ, मनोज पौडेल, देबी प्रसाद छन्त्याल, मनु पुन फगामी, लक्ष्मी कुमारी केसी कार्की र रामजी शर्मा रहनुभएको छ ।
८ औं अधिवेशन तथा १९ औं कार्यकारी सभाको बेनी नगरपालिकाका नगर प्रमुख सुरत केसीले उद्घाटन गर्दै गलेश्वरधाम जस्तो धार्मिक स्थलको चर्चा संगै संरक्षण र थप प्रचारको आवश्यकता रहेको बताउनु भयो ।
नगरपालिकाभित्रका धार्मिक पर्यटनको विकासका लागि नगरपालिका सक्रिय रहेको बताउनुभयो । उहाँले कोषको रकमलाई प्रभावकारी तथा पारदर्शी बनाउनुपर्नेमा जोड दिइएको थियो । काली गण्डकी नदी किनारमा ९ रोपनी क्षेत्रफलमा फैलिएको एउटै चट्टानमाथि अवस्थित गलेश्वरलाई विश्वकै अलौकिक धार्मिक स्थलको रुपमा लिइन्छ । आदर्शसञ्चारबाट साभार
