बागलुङ, ९ असोज – सांसद चम्पादेवी खड्काले सहकारीमैत्री ऐन निर्माणका लागि आवश्यक पहल गर्ने बताएकी छिन् । युनियन बहुउद्देश्यीय सहकारी संस्था लिमिटेड बागलुङको नवौ साधारणसभाको उद्घाटनपछि बोल्दै सांसद खड्काले अहिले बिद्यमान सहकारी ऐन नियम सहकारीमैत्री नभएको गुनासो आएकाले त्यसलाई सहकारीमैत्री बनाउन संसदमा भुमिका खेल्ने बताइन । युनियन सहकारीले जिल्लामा फरक पहिचान बनाएकोमा खुशी व्यक्त गर्दै उनले सहकारीलाई अझ व्यवस्थित र प्रभावकारी बनाउन शेयर सदस्यहरुलाई सहकारी शिक्षा तालिम जस्ता कार्यक्रमलाई पनि निरन्तरता दिनुपर्नेमा जोड दिइन । सहकारीले गत आर्थिक बर्षमा १३ करोड २४ लाख ९७ हजार ७ सय १६ रुपैयाँको कारोबार गरेको कोषाध्यक्ष चन्द्रकान्त शर्माले बताए । संस्थाले ३६ लाख ४५ हजार ३ सय ९२ आम्दानी र १ लाख ४५ हजार ८ सय ७२ रुपैयाँ मुनाफा गर्न सफल भएको सहकारीका सचिव अगम कुमार पालिखेले प्रगति प्रतिबेदनमार्फत जानकारी गराएका थिए । साधारणसभामा खुत्रुके बचत तथा आवधिक बचतकर्ता संयुक्त कुँवर, राजु गौतम, असल ऋणी झलक सुवेदी, चल्ती बचतमा अमृता श्रेष्ठ र उत्कृष्ट एसएलसी उत्र्तिण समृद्धि सापकोटालाई सम्मान गरिएको अध्यक्ष दुर्गाबहादुर कुवंरले जानकारी दिए । कार्यक्रममा सहकारीका संस्थापक कविन्द्र शर्मा, बहुउद्देश्य सहकारी बागलुङकी अध्यक्ष हुमाकुमारी जिसी ‘अञ्जु’, सल्लाहकार गुरुप्रसाद शर्मा, सदस्य सिता शर्मा लगायतले शुमकामना मन्तव्य व्यक्त गरेका थिए । सहकारीका अध्यक्ष दुर्गाबहादुर कुवंरको अध्यक्षतामा सम्पन्न भएको साधारणसभामा स्वागत मन्तव्य उपाध्यक्ष मेघनाथ शर्मा गैरे र संचालन सचिव अगम कुमार पालिखेले गरेका थिए ।
यसैगरी, सांसद केशरी घर्ती मगरले मुलुकलाई आर्थिक समृद्धितर्फ उन्मुख गराउन सहकारीले महत्वपूर्ण भुमिका खेल्नुपर्ने बताएकी छिन् । लखन बहुउद्देश्यीय सहकारी संस्था लिमिटेड बागलुङको नवौ बार्षिक साधारणसभाको शनिवार उद्घाटनपछि बोल्दै सांसद घर्तीले गरिबी अन्त्य गर्दै समाजलाई समृद्ध बनाउने दिशा तर्फ सहकारीले कोशेढुङ्गोका काम गर्नुपर्नेमा जोड दिएकी छिन् । सहकारी पनि सम्पन्नको पहुँच र मुनाफामा केन्द्रित हुने सम्भावना प्रति चिन्ता व्यक्त गर्दै सांसद घर्तीले हरेक नागरिकलाई सहकारीको पहुँचमा ल्याएर सहकारीमार्फत अघि बढ्नुपर्ने आवश्यकता औल्याइन । उनले सहकारीहरुलाई ऐन नियम र उद्देश्यमूलक हिसावले सञ्चालन गर्न आग्रह गर्दै सहकारी ऐन नियमको समयअनुकल परिमार्जनका लागि पहल गर्ने प्रतिवद्धता समेत व्यक्त गरेकी छिन् । कार्यक्रममा जिल्ला बचत तथा ऋण सहकारी संस्था बागलुङका अध्यक्ष चण्डिप्रसाद शर्मा, बहुउद्देश्यीय सहकारी संघका अध्यक्ष अञ्जु जिसी, लखन बहुउद्देश्यीय सहकारी संस्थाका पूर्वअध्यक्ष श्यामबहादुर राना, संकल्प बहुउद्देश्यीय सहकारी संस्था बागलुङका उपाध्यक्ष ओमबहादुर थापा, सहज बचत तथा ऋण सहकारी संस्था बागलुङका सचिव खड्क थापा मगर, शेयर सदस्यका तर्फबाट नानीमाया पुनले मन्तव्य व्यक्त गरेका थिए । सो अवसरमा संस्थाका ज्येष्ठ शेयर सदस्य भकुण्डे–३ का लालबहादुर थापा, निवर्तमान अध्यक्ष श्यामबहादुर रानालाई सम्मान गरिएको थियोभने बाल बचततर्फ उत्कृष्ट बानपा ३ का सन्देश थापा, दैनिक बचततर्फ बानपा–१ का उजेली थापा, मासिक बचतमा चन्द्रकुमारी पुन, चल्तीमा बानपा २ का शेरबहादुर श्रीस, आवधिकमा पैयुथन्थाप–७ का यामबहादुर थापा, लखन बिशेष दिर्घकालिनमा तंग्राम–६ का होमबहादुर थापा, असल कर्मचारीबाट शान्ति थापालाई पुरस्कृत गरिएको संस्थाका कोषाध्यक्ष तेजेन्द्र थापा मगरले जानकारी दिए ।
साधारणसभाले सचिव रिता राना पुनले प्रस्तुत गरेको प्रगति प्रतिवेदन, कोषाध्यक्ष तेजेन्द्र थापाले प्रस्तुत गरेको आर्थिक प्रतिवेदन, लेखा समितिका संयोजक ज्ञानबहादुर थापाले तयार गरेको लेखा प्रतिवेदन र ऋण उपसमिति संयोजक हिराबहादुर थापाले प्रस्तुत गरेको प्रतिवेदन सुझाव सहित पारित गरिएको छ । लखन बहुउद्देश्यीय सहकारी संस्था लिमिटेड बागलुङका अध्यक्ष मिनबहादुर श्रीसको अध्यक्षतामा सम्पन्न भएको कार्यक्रमको स्वागत मन्तव्य उपाध्यक्ष कुसुम बुढा पुन र संचालन सचिव रिता राना पुन र सहसचिव रेशम आले मगरले गरेका थिए ।
