बागलुङ, ९ असोज – भूकम्पले क्षतिग्रस्त भएर पुनर्निमाण भइरहेको बागलुङको विद्यामन्दिर माध्यमिक विद्यालयलाई पूर्वराज्यमन्त्री ओमकार गौचनले १२ लाख ५० हजार नगद सहयोग गरेका छन् ।
विद्यामन्दिर माध्यमिक विद्यालयका प्रधानाध्यापक जगन्नाथ आर्चायका अनुसार गौचनले शुक्रबार उक्त रकम विद्यालयको नामको बैंक खातामा जम्मा गरिदिएका हुन् । स्मरण रहोस् गौचन विद्यालयका संस्थापक ओमप्रसाद गौचनका छोरा हुन् ।
यसैगरी विद्यामन्दिर माध्यमिक विद्यालयका कार्यरत सम्पूर्ण शिक्षक कर्मचारीहरुले पनि सामूहिक रुपमा १२ लाख ५० हजार नगद रुपैयाँ नै सहयोग गरेका छन् ।
विद्यामन्दिर माध्यमिक विद्यालयका संयोजक डिल्लीराज गौतम भने, ‘सम्पूर्ण शिक्षक कर्मचारीहरुले एक महिना बराबरको तलब सामूहिक रुपमा विद्यालय निर्माणमा लगाउँदा उल्लिखित रकम प्राप्त भएको हो ।’
जनस्तरबाट व्यापक सहयोग भए पनि सरकारी स्तरमा जिल्ला शिक्षा कार्यालय बागलुङको बहुबर्षीय योजना अन्तर्गत ६० लाख रुपैयाँ स्वीकृत भए पनि अन्य सहयोग नरहेको जानकारी प्रअ आचार्यले दिए ।
उनले भने ‘भूकम्प प्रतिरोधी अत्याधुनिक भवन निर्माणका लागि जनस्तरबाट प्राप्त हुन थालेको सहयोगले विद्यालय परिवार उत्साहित छ ।’ गौतमका अनुसार विद्यालयको पुननिर्माणका लागि कार्तिक ३ गतेदेखि विद्यालयले शैक्षिक महोत्सव तथा महायज्ञ गर्दैछ । यसका लागि तयारी तीव्र बनाइएको पनि उनले बताए ।
देश विदेशबाट सहयोग गर्न चाहनेका लागि विद्यामन्दिर उच्च माध्यमिक विद्यालयले विद्यालयका नाममा रहेको नेपाल बैकको खाता नम्बर ०२२००१००४०३२८००००००१ र ग्रिन डेभलपमेन्ट बैंकको खाता नम्बर ००१२१२००००२४ ७८०००००१ खुल्ला रहका छन् ।
