रियललाई ‘अपराजेय’ टोलीमा परिणत गर्दैछन् जिदान

म्याड्रिड,५ असोज-जब गत जनवरीमा जिनेदिन जिदान रियल म्याड्रिडका प्रशिक्षक नियुक्त भए, ‘स्पेनिस जाइन्ट’ क्लब अस्तव्यस्त थियो । राफा बेनिटेजको नेतृत्वमा लस ब्लांकोस चिरप्रतिद्वन्द्वी एथ्लेटिको म्याड्रिड र बार्सिलोनाभन्दा निकै पछि परिसकेको थियो । पछिल्ला ८ खेलमध्ये चारमा अंक गुमाएको थियो भने अझै उनीहरु बार्सासँग आफ्नै घरेलु मैदानमा ४–० को लज्जास्पद पराजय बेहोरेकोले स्तब्ध थिए ।अहिले ९ भन्दा महिनाभन्दा कम समयमा रियल युरोपियन च्याम्पियन मात्र बनेको छैन, ला लिगाको लगातार सबैभन्दा धेरै जीत निकाल्ने किर्तिमान तोड्ने ताकमा छ ।
आइतबार एस्पानियोलबिरुद्ध निकालेको २–० को जीत जिदानको टोलीको लगातार १६ औं जीत थियो । गत सिजन लगातार १२ खेलमा जित निकाल्दै रियल बार्सिलोनाभन्दा मात्र १ अंकले पछि परेको थियो । यो सिजन रियलले चारवटै खेलमा जीत निकाल्दै ला लिगाको शीर्ष स्थानमा रहेको छ । यो जीतको श्रृंखला रियलको लागि किर्तिमान हो भने यसअघि सन् २०१०–११ पेप ग्वार्डिओलाको टोलीले बनाएको किर्तिमानको बाराबरी हो ।
बुधबार राती हुने खेलमा भिल्लेरियाललाई आफ्नो घरेलु मैदानमा हराए रियलले नयाँ किर्तिमान बनाउनेछ । आखिर छाटो समयमा कसरी जिदानले रियललाई यस्तो परिवर्तन गर्न सफल भए त ?
कासिमेरोको प्रयोग
२७ फेब्रुअरी २०१६ को शनिबार ४४ वर्षीय जिदानको प्रशिक्षकको शुरुवाती दिनमा निर्णायक मोड थियो । सो दिन रियल आफ्नै घरेलु मैदानमा एथ्लेटिकोसँग १–० ले पराजित बनेको थियो । घरेलु समर्थकले मैदानमा नै उनीविरुद्ध आक्रोश पोखेका थिए । प्रशिक्षक परिवर्तन भए पनि रियलको खेल परिवर्तन नभएकोमा उनीहरु रुष्ट थिए ।
त्यति बेलासम्म जिदानले सकेसम्म धेरै आक्रमक खेल खेल्ने खेलाडी शुरुवाती ११ मा समावेश गरेर आफ्नो बेलाको जस्तै उत्साहपूर्ण फुटबल खेल प्रदर्शन गर्ने प्रतिबद्धता पूरा गर्ने प्रयासमा थिए । तर, त्यसले काम गरिरहेको थिएन । फरवार्डहरु एक अर्काको बाटोमा तगारो बनिरहेका थिए भने मिडफिल्डमा रक्षात्मक सोच नभएको कारण टोली सँधै खतरामा थियो । जसको एथ्लेटिकोले भरपुर फाइदा उठायो र मैदानको बीच भागबाट बल अघि बढाउँदै सजिलै एन्टोनियो ग्रिजमानको निर्णायक गोलका लागि अवसर सृजना गर्यो । बल्ल जिदानलाई लाग्यो केही परिवर्तनको आवश्यकता थियो, त्यो परिवर्तन थियो रक्षात्मक मिडफिल्डर कासिमेरोको प्रवेश । यसअघि ब्राजिलका लो प्रोफाइल भएका मिडफिल्डरले जिदानको नेतृत्वमा मात्र २३ मिनेट खेल्न पाएका थिए ।
सन् २०१३ को फेब्रुअरीमा साउ पाउलोबाट बर्नेबाउ आइपुगेका कासिमेरोले जोसे मोरिन्होको नेतृत्वमा रहेको रियलका लागि रियल बेटिसविरुद्धको खेलमा डेब्यु गर्न पाएका थिए ।
तर, अर्को सिजन कार्लो एन्चेलोटीले उनलाई लोनमा पोर्टो पठाए भने शुरुमा बेनिटेज र पछि जिदानले बेन्चमा सिमित राखे । दुवै प्रशिक्षकले अट्याकिङ खेलाडी मैदान उतार्नुपर्ने बाध्यतालाई झेल्न सकेनन् । तर, म्याड्रिड डर्बीमा बेहोरेको पराजयले जिदानलाई आफ्नो निर्णयमा सोच्न बाध्य तुल्यायो । योसँगै कासिमेरो रियलको टोलीको अभिन्न अंग बने । उनको सशक्त शरिर, ट्याकल गर्ने क्षमता र अनुशासनले टिममा खट्किएको मिडफिल्डमा डिफेन्सिभ खेलाडीको कमीलाई पूर्ती गर्यो ।
कहिले हार नमान्ने टोली
रियलले आफ्नो विजयको श्रृंखलाको शुरुवात लेभान्तेलाई ३–१ लाई पराजित गर्दै गर्यो । त्यसपछि लगातार पाँच खेल जितेपछि फेरि सामाना भयो बार्सिलोनासँग । अप्रिल २ मा बार्सिलोनाको घरेलु मैदानमा तय भएको थियो सिजनको दोस्रो एल क्लासिको । त्यतिबेला बार्सिलोना एक हप्ताअघि निधन भएका क्लब लिजेन्ड जोहान क्रायफलाई श्रद्धाञ्जली व्यक्त गर्दै थियो । र, रियललाई पराजित गरेर उनी प्रति सम्मान प्रकट गर्ने सोच बनाएको थियो ।
तर, ठीक उल्टो भयो । जेरार्ड पिकेको गोलले पछि परेको रियल करिम बेन्जेमा र क्रिस्टियानो रोनाल्डोको गोलको मद्दतले विजयी भयो ।रियलको जीत सन्तोषजनक नभएपनि खेलाडीहरुले जिदानको निर्देशन भने पालना गरे – त्यो थियो जतिसक्दो धेरै कुद्ने । च्याम्पियन्स लिग फाइनलमा एथ्लेटिकोको सामना गर्दा पनि जिदानले त्यही सन्देश दोहोराए, ‘हामीले सकेभन्दा धेरै कुद्नुपर्छ ।’ मेगास्टारहरुले भरिएको रियलको ग्यालाक्टिको टोलीले प्रदर्शन गर्ने आक्रामक फुटबल खेल्नेभन्दा पनि उनी आफ्नो टोलीलाई आफ्नो रक्षात्मक जिम्मेवारी पूरा गर्ने र राम्रो नखेलेको दिन पनि जित निकाल्न सक्ने टोलीमा बदल्दै थिए ।
पछिल्ला १९ मध्ये ७ खेलमा रियलले अन्तिम १० मिनेटमा गरेको गोलको मद्दतले जित निकालेको छ । हालैमात्र च्याम्पियन्स लिगमा स्पोर्टिङविरुद्ध पनि १–० ले पछि परेको स्थिति उल्टाउन अन्तिम मिनेटसम्म संघर्ष गरेको थियो । मार्काले खेलपछि रियललाई ‘कमब्याक एफसी’ भनेर सम्बोधन गर्यो र जिदानले टोलीलाई हार नमान्ने टोलीमा परिणत गर्दै गरेको उल्लेख गर्यो ।
टोलीमा परिवर्तन
जिदानले आफ्नो कार्यकालमा शुरुवाती ११ मा खेलाडीहरु नियमित रुपमा परिर्वत गरेका छन् । उनले समूहिकताको भावना पैदा गर्दै सबै खेलाडी महत्वपूर्ण रहेको सन्देश दिइरहेका छन् ।
हुनतः सबै प्रशिक्षकले त्यस्तै कुरा दोहोराउँछन् । तर, उनीहरुले त्यसलाई कुरामा सिमित राख्छन् भने जिदान भने त्यसलाई व्यवहारमा लागु गर्छन् ।
यस सिजन रियलले लिगको चार खेलमा २१ फरक खेलाडीलाई मैदानमा उतारेको छ । गोलकिपर किको कासिला र कप्तान सर्जियो रामोशले मात्र सबै खेल खलेका छन् । त्यस्तै हालसम्म खेलिएका ६ वटा प्रतिस्पर्धात्मक खेलमा जिदानले ५ वटा फरक फरवार्ड लाइन प्रयोग गरेका छन् । जसले गर्दा रियलले लिगमा गरेको १२ गोलमध्ये ११ फरक–फरक खेलाडीले गरेका छन् ।
म्याड्रिडका फुटबल पत्रकार टोमास रोनसेरोले लेखेका छन्, ‘जिदानले ११ जना होइन २४ खेलाडीको टोलीको नेतृत्व गर्छन् । उनीसँग प्लान बी मात्र होइन प्लान सी र डी पनि छ । मैले अहिलेसम्म म्याड्रिडलाई यति पूर्ण र भरोसा गर्न लायक देखेको थिइँन ।’
उनको सन्देश बार्सिलोनका लागि पनि थियो । बार्सिलोना मेस्सी, सुवारेज र नेयमारमाथि बढी भर परेको भन्ने आरोप लाग्ने गरेको छ । यसअघि आलाभेसको खेलमा तीन जनालाई सँगै नउतार्दा बार्सिलोना आफ्नै घरेलु मैदानमा २– ले पराजित बन्यो ।
शान्त र व्यक्तिगत व्यवस्थापन
सायद कमै प्रशिक्षकले एउटा खेलाडीलाई महिनौसम्म बेन्चमा राखेर एउटा खेलमा पुनः बोलाएर, उसैको मद्दतले किर्तिमानी गोल गर्दै आफ्नो लागि तारिफको शब्द सुन्छन् होला । तर, जिदानले जेम्स रोड्रिग्वेजको हकमा त्यही गरेका छन् । यस सिजन पहिलो शुरुवात दिएका जिदानलाई उनले नै एस्पानियोलविरुद्ध २–० को जित दिलाए । खेलपछि जेम्सले भने, ‘जिदान मेरो आइडल हुन् ।’
जिदान आफै पनि सफल फुटबल करियरपछि प्रशिक्षक बनेका कारण खेलाडीहरुसँग राम्रो सम्बन्ध राख्न र उनीहरुको सम्मान हासिल गर्न सफल भएका छन् । रियलमा स्टार खेलाडीहरुको इगोलाई पनि जिदानले सफलतापूर्वक म्यानेज गरेका छन् । मिडिया र साइडलाइनमा सँधै मुस्कानका साथ देखिन्छन् जिदान । एउटै प्रश्न सयौं पटक सोध्दा पनि रिसाउँदैनन् । ट्रान्सफर विन्डोमा उनलाई कयौं पटक जेम्सलाई बच्ने हो भनेर सोधियो । तर, उनले सँधै शान्त भएर जवाफ दिन्थे ।
भाग्यमानी
यदी कोही बार्सिलोनाको समर्थकलाई सोध्नुभयो भने उसले भन्ने छ, जिदान भाग्यमानी प्रशिक्षक हुन् । जेराड पिकेले समेत च्याम्पिन्यस लिगमा रियलले सहज प्रतिद्वन्द्वी पाएको भन्दै ट्वीट गरेक थिए । हुन पनि किर्तिमानी जीतको श्रृंखलामा धेरै पटक खेलको अन्त्यतिर गोल गर्दै जीत निकालेको छ । तर, लगातार १६ वटा जितलाई यति सजिलै नजरअन्दाज पनि गर्न सकिन्न ।
यो सिजन अझै धरै बाँकी छ र जिदानको परिक्षा पनि । भिल्लेरियालविरुद्ध जित निकाल्दै जिदानले नयाँ कोशेढुंगा पार गर्नेछन् वा छैनन् त्यो भने हेर्न बाँकी छ ।बिबिसीको सहयोगमा