ओलीलाई बुद्धको उपदेश सुनाउँदै एमाले नेता भुसालको फरक दस्तावेज

काठमाडौँ, ५ असोज-नेकपा एमालेको आजदेखि शुरु भएको केन्द्रीय कमिटी बैठकमा उपमहासचिव घनश्याम भुसालले फरक दस्तावेज प्रस्तुत गर्दै छलफलमा पठाउन अध्यक्ष केपी ओलीसमक्ष आग्रह गरेका छन् ।
पार्टीभित्र माधव नेपाल गुटका नेता मानिने उपमहासचिव भुसालले अध्यक्ष ओलीको ३२ पृष्ठ लामो राजनीतिक दस्तावेजमाथि फरक मत राखेका हुन् । भुसालको फरक मत २६ पृष्ठ लामो छ ।
भुसालले आफ्नो दस्ताबेजमा ओलीको राजनीतिक विश्लेषणमाथि खासै फरक मत नजनाए पनि संगठन सञ्चालन पद्धतिमा भने व्यापक असहमति राखेका छन् । उनले एमाले पार्टी गुटबन्दीले कमजोर बनेको बताएका छन् ।
राष्ट्रिय, अन्तर्राष्ट्रिय सन्दर्भ र तत्कालिन राजनीतिक विषयमा ओलीसँग भुसालले विमति राखेका छैनन् । तर कतिपय सन्दर्भहरुलाई हेर्ने बैचारिक सैद्धान्तिक दृष्टिकोणमा उनले आफ्नो अलग मत राखेका छन् ।
पार्टी अध्यक्ष ओली र महासचिव ईश्वर पोखरेलको कार्य सञ्चालनमा विमति राख्दै उपमहासचिव भुसालले अब पार्टीलाई गुटबन्दीबाट मुक्त गर्नुपर्ने बताएका छन् । एमालेमा नवौं महाधिवेशनदेखि गुटबन्दी संस्थागत भएको उनको फरक प्रतिवेदनमा किटान गरिएको छ ।
भुसालले भनेका छन्, ‘अहिले हाम्रो पार्टीका लागि गुटबन्दी सबैभन्दा ठूलो आन्तरिक एमालेमा गुटबन्दी छ । हामी सबै आम रुपमा गुटबन्दीमा छौं । हामी नवौं महाधिवेशनमा औपचारिक रुपमा गुटमा बाँडियौ र निर्वाचित र पराजित भयौं । त्यसपछिका हाम्रा सम्बन्धहरु महाधिवेशनमा को कता थियो भन्ने आधारमा बिभाजित भएका छन् ।’
भुसालले एमालेभित्र गुटमा विभाजित नभएका कोही पनि नेता कार्यकर्ता बाँकी नरहेको प्रष्ट पारेका छन् । कसैले म गुटबन्दीमा छैन वा गुटबन्दी गर्दिन भन्छ भने त्यो आत्मवञ्चना वा पाखण्डमात्रै हो । हामी गुटबन्दीले यति गाँजिएका छौं कि पार्टीप्रति इमान्दार छैनौं ।
यसबीचमा प्रायः जिल्लादेखि टोलसम्मका अधिवेशनमा गुटबन्दीका आधारमा निर्वाचन भएको भन्दै भुसालले यसको अन्त्य गर्ने उपाय खोजिनुपर्ने माग केन्द्रीय कमिटी समक्ष राखेका छन् ।
गुटबन्दीले एमाले कार्यकर्ताहरुलाई सामाजिक सञ्जालमा समेत विभाजित गरेको भुसालको निष्कर्ष छ । उनले भनेका छन्, ‘सामाजिक सञ्जालमा अर्को गुट वा गुटका नेताविरुद्ध जस्तोसुकै अपमान गराउने कार्य भइरहेको छ ।’
उनले अध्यक्ष केपी शर्मा ओलीले पार्टीमा एक व्यक्ति एक पद भनेर अध्यक्ष तथा संसदीय दलको नेता जिते पनि आफू जितेपछि त्यो मान्यता कायम नगरेको बताएका छन् ।
भुसालको प्रतिवेदनमा भनिएको छ- एक व्यक्ति एक पदको नारा लगाएर जितेपछि कि त दलको नेताबाट राजिनामा दिनुपर्थ्यो कि त्यो नारा नै गलत थियो भन्नुपथ्र्यो । आफूलाई जे फाइदा हुन्छ, त्यही पद्धति हो भन्ने कुरा यसबाट स्थापित भयो ।
मन्त्री लगायत राजकीय पदहरुमा नियुक्ति गर्दा पनि गुटबन्दीले काम गरेको भन्दै उनले यसबीचमा अपवाद बाहेक संस्थापन पक्षले एकलौटी गरेको बताएका छन् । पुरुषोत्तम पौडेलले खेलकुद मन्त्री हुँदा जिल्ला खेलकुद विकास समितिमा नियुक्ति गर्नु अपवाद थियो भन्दै उनले अरु सबैमा संस्थ्ाापनलाई दोषी देखाएका छन् ।
महासचिव ईश्वर पोखरेल नेतृत्वको केन्द्रीय सचिवालयको पनि भुसालले चर्को आलोचना गरेका छन् । उनले केन्द्रीय सचिवालय विधि विधान अनुसार नचलेको भन्दै यसबारे केन्द्रीय कमिटीले ठोस निर्णय गर्नुपर्ने बताएका छन् ।
गौतम बुद्धका उपदेश र अन्तरक्रियाहरुबाट आफ्नो धारणालाई पटक-पटक पुष्टि गर्न खोजेका भुसालले राजनीतिक दस्तावेजको अन्त्य पनि बुद्धकै वाणीहरुबाट गरेका छन् ।
उनी अगाडि लेख्छन्- तत्कालीन विकसित मगध राज्यका राजा अजात शत्रुले अविकसित बज्जीकामाथि आक्रमण गर्ने निर्णय गरे । त्यसैबेला बुद्ध मगध पुगेका थिए । आफ्नो योजनाबारे सल्लाह माग्न राजाले आफ्ना मुख्य दूतलाई बुद्धकहाँ पठाए । जब दूतले राजाको योजना बुद्धलाई बताए र सल्लाहका लागि अनुरोध गरे, बुद्धले नजिकै बसेका आफ्ना मुख्य चेला आनन्दतिर फर्केर सोधे-
बुद्धः- आनन्द १ बज्जीहरु पहिले जस्तै संगठित छन् ?
आनन्द-हो पहिले झैँ अहिले पनि संगठित छन् ।
बुद्धः-उनीहरुले आफ्ना सबै निर्णय सामुहिकरुपमा गर्छन् ?
आनन्द- हो, गर्छन् ।
बुद्ध-उनीहरु जब आफ्ना समस्याका बारेमा छलफल गर्छन्, पहिले झैँ सानो-ठूलो नभनिकन समान हैसियतमा रहेर छलफल गर्छन् ?
आनन्द- हो, त्यसै गर्छन् ।
बुद्ध-पहिले-पहिले आफ्ना निर्णय लागू गर्न सबैले दिलोज्यानले काम गर्थे, आजकल पनि त्यसै गर्छन् ?
आनन्द-सबैले सामुहिक निर्णय गर्छन्, सबैले लागू गर्छन् ।
एमाले उपमहासचिव भुसाल बुद्धलाई उधृत गर्दै त्यसपछि लेख्छन्- ‘बुद्ध राजाका दूततिर फर्के र भनेः यदि बज्जीहरु सामुहिकतामा त्यति बढी विश्वास गर्छन् भने उनीहरुमाथि बिजय पाउन सम्भव छैन । उनीहरुमाथि आक्रमण गर्ने धृष्टता नगर्नू । यो शिक्षा आज नेकपा एमालेका लागि पनि असाध्यै महत्वको छ । हामीले पनि सामुहिक रुपमा छलफल गर्ने, निर्णयमा सबैलाई सहभागी गराउने र त्यो निर्णयको पालना सबैले गर्ने हो भने राष्ट्रिय एकतालाई सुदृढ गर्दै र राष्ट्रिय पुँजीको विकास गर्दै समाजवाद तर्फ अगाडि बढ्न कसैले रोक्न सक्दैन ।’