भकुण्डेमा निर्माण हुदै भ्यू टावर

बागलुङ,५ असोज-जिल्लाको भकुण्डेमा आर्थिक अभावले रोकिएको भ्यू टावर निर्माणको कामलाई पुनः तिव्रता दिइएको छ । भकुण्डे गाविस वडा नम्बर १ मुलाबारीको डाँडोमा निर्माण थालिएको भ्यू टावरका लागि आवश्यक रकम उपलब्ध हुन नसकेपछि बिचमा रोकिएको थियो ।धौलागिरीको नै एकमात्र होम स्टे भकुन्डेमा पर्यटकहरुलाई आकर्षित गर्ने उद्देश्यले आर्थिक वर्ष २०६७/६८ बाट भ्यू टावर निर्माण सुरु भएको थियो । यस वर्ष पर्यटन मन्त्रालयको १५ लाख रुपैयाँ उपलब्ध गराएपछि निर्माण कार्यलाई अगाडि बढाइएको निर्माण समितिका अध्यक्ष देवेन्द्र थापाले जानकारी दिए ।
हालसम्म भ्यू टावर निर्माणका लागि पर्यटन मन्त्रालयको ६ लाख, जिल्ला विकास समितिको ९ लाख, गाविसको एक लाख र बिभिन्न क्षेत्रबाट प्राप्त रकम गरी २० लाख रुपैयाँ खर्च भइसकेको छ । भ्यू टावर बनाउन स्थानीयले जनश्रमदान गरेका छन् ।
यस वर्ष भ्यू टावरलाई चार तला ढलान गरी ढुंगाले छाउने, वरिपरि तारवार लगाउने, रोलिङ हाल्ने काम सम्पन्न भएको थापाले जानकारी दिए । आगामी एक बर्ष भित्रसम्म सम्पन्न गर्ने लक्ष लिइएको भ्यू टावरमा खानेपानी, शौचालय र घोरेटो बाटो निर्माणको काम बाँकी नै छ । यसका लागि थप १५ लाख रुपैयाँ लाग्ने समितिले जनाएको छ । भकुन्डे गाविसलाई पर्यटकीय गन्तव्यको रुपमा विकास गर्न होमस्टे सञ्चालन गरिएको छ ।