दुर्लभ सेतो गोही भेटीयो

एजेन्सी/उत्तरी अष्ट्रेलियामा सेतो रंगको गोही फेला परेको छ । डार्विन नजिक ऐडिलेड नदीमा यो दुर्लभ गोही फेला परेको हो । प्रत्यक्षदर्शीका अनुसार यसको लम्बाई करिब ३ मिटर छ । सेतो रंगको गोहीको नाम ‘पर्ल’ राखिएको छ । यो दुर्लभ गोहीबाट पर्यटन व्यवसायी निकै उत्साहित भएका छन् ।
एक गैरसरकारी वन्य जीवन संरक्षण समूहका अध्यक्ष ब्राडीले भनेकी छन, ‘सबैजना निकै उत्साहित छन् । म पूरै दिन भावविभोर भएर उसलाई हेरिरहें ।’ सन् २०१४ मा पनि सेतो रंगको हाइपोमेलनिस्टिक गोही फेला परेको थियो । निकै चर्चामा आएको उक्त गोहीले एकजना माझीलाई मारेपछि स्थानीयबासीले पनि उसलाई मारेका थिए । अहिले फेला परेको सेतो रंगको गोहीको सम्वन्ध पनि त्यही गोहीसँग हुनसक्ने स्थानीयबासीको अनुमान छ । गोही सेतो किन हुन्छ ? जीव बैज्ञानिकका अनुसार हाइपोमेलनिज्मको कारण गोहीको रंग हल्का पहेंलो जस्तो देखिन्छ । हाइपोमेलनिज्म त्यो अवस्था हो जसमा छालाको रंग निर्धारण गर्ने मेलनिनको मात्रा कम हुन्छ । अष्ट्रेलियामा पाइने धेरैजसो गोहीको रंग खैरो हुन्छ या हरियो हुन्छ ।
यस रंगले उनीहरुलाई पहिचान गर्न मद्दत गर्छ । चार्ल्स डार्विन विश्वविद्यालयमा रिसर्च एसोसियट ऐडम व्रिटनका अनुसार पर्लको हाइपोमलनिज्मको कारण वंशाणुगत हो या अण्डामा गडबड भएर हो । अण्डामा गडबडी भयो भने तापमान बढी भएर कोशिकाको बिभाजनमा असर पर्दछ । उनी भन्छन्, ‘यसप्रकारले हुने बदलावमा रंग परिवर्तन वा छालाको ढाँचामा परिवर्तन हुन्छ ।’ के यो विरलै घटना हो ? व्रिटन भन्छन् फार्ममा साना गोहीमा यस्तो हुनु सामान्य कुरा हो तर पहेंलो वा सेतो गोही परभक्षीसँग बच्न निकै मुस्किल हुन्छ । ‘हल्का रंगवाला वयस्क गोही देखिनु थोरै असामान्य हो,’ उनी भन्छन्, ‘मैले कहिलेकाहीँ यस्तो गोही देखेको छु तर यति ठूलो आकारको यस्तो गोही भने कहिले पनि देखेको थिएनँ ।’