जमिन भाँसियो, १५ घर उच्च जोखिममा

पर्वत, ३ असोज/जिल्लाको मुडिकुवा गाउँ विकास समितिको वडा न ५ मा जमिन भाँसिदा झण्डै १५ घर जोखिममा परेका छन् । अविरल बर्षातका कारण जमिन भाँसिदा मुडिकुवा गाउँ विकास समितिको माटेदेबल मन्दिर नजिकका झण्डै १५ घर  जोखिममा परेको स्थानीयले बताएका हुन । ‘मन्दिर नजिक ठूला–ठूला खाल्डा परेको उल्लेख गर्दै स्थानीय पुजारी शिव पुरीले जमिनमा परेका खाल्डाहरुका कारण मन्दिरसहित नजिकका झण्डै १५ वटा घर जखिममा परेको बताए । जमिन भाँसिने क्रम नरोकिने होभने मन्दिर नजिकका घर विस्थापीत हुनुपर्ने अवस्था आउन लागेको स्थानीय देवीप्रसाद बिलासीले बताए । बिलासीका अनुसार, जमिन भाँसिदा निकै ठूला खाल्डा परेका छन् । खाल्डा मुनीबाट पानी बग्दै जाँदा जमिनको अन्य सतह पनि भाँसिन सक्ने अनुमान स्थानीयले गरेका छन् । गाविसको ऐतिहासिक मन्दिरको रुपमा रहेको माटेदेबल मन्दिर परिपरमा मात्र दुईवटा ठूला खाल्डा परेका छन् । जमिन भाँसिदै जाँदा कृषकले लगाई राखेको धान खेत पनि जमिनमुनी गड्न थालेको बताइएको छ । ऐतिहासिक मन्दिर संरक्षणको स्थानीयको प्रयासमा काम भईरहे पनि जमिन भाँसिन थालेपछि मन्दिर संरक्षण अभियान समेत समस्या परेको स्थानीय बिलासीले बताए । जमिनको भित्री सतहमा धेरै पानी भएका कारण जमिन गलेका कारण भाँसिएको हुनसक्ने स्थानीय विष्णुप्रसाद तिवारीको भनाई रहेको छ । उनले बर्षातले जमिनको भित्री तहसम्म असर पुराएको हुनसक्ने र भलको ब्यवस्थापन एवँ जमिनको संरक्षण गर्नसके जमिन भाँसिने क्रम रोकिन सक्ने बताए । यसैवीच, पर्वतको भुकदेउरालीमा जमिन फाँट्दा त्यहाँका ५ परिवार समेत विस्थापीत भएका छन् । भुकदेउराली गाविसको भुकताङलेको जमिन भाँसिदा स्थानीय ५ परिवार त्यहाँबाट विस्थापीत भएको स्थानीय डिलबहादुर गुरुङले जानकारी दिए । विस्थापीतहरु भने सुरक्षित स्थानमा बास बसिरहेको जिल्ला प्रहरी कार्यालय पर्वतले जनाएको छ । बुधवार आएको वषासँगैको पहिरोले उनिहरु विस्थापित हुनु परेको स्थानिय महानबहादुर गुरुङ्गले जानकारी दिए । आर्थिक रुपमा कमजोर अवस्था भएका परिवारहरु जीवनमा नसोचेको घटना भएपछि बिचल्लीमा परेका छन् । तत्काल अर्को ठाउँमा बस्ती सार्न न जग्गा छ न पैसा निकै समस्यामा परेको गुरुङ्गले बताए । उनीहरुले आफुहरुलाई सुरक्षित स्थानमा सार्ने व्यवस्था गरिदिन पनि आग्रह गरेका छन् । सोहि पहिरोका कारण बस्ती नजिकै रहेको करायटोलको खानेपानी योजना पुर्ण रुपमा अबरुद्ध बनेको छ । पहिरोले ट्याङ्की नै बगाएपछि खानेपानी सेवा अवरुद्ध बनेको गुरुङ्गले जानकारी दिए ।