शिक्षकलाई तालिम

बागलुङ, ४ असोज – राष्ट्रिय स्कुल जिम्न्यास्टीक फेडरेशनको आयोजनामा खेलकुद शिक्षकहरुका लागि एक दिने प्रशिक्षण कार्यक्रम सम्पन्न भएको छ । विद्यालयका शिक्षकलाइ दक्ष बनाएर बालबालिकालाइ पनि विभिन्न शारिरीक सुगठन सिकाउन सकुन भन्ने उद्धेश्यले फेडरेशनको जिल्ला शाखाले तालिमको आयोजना गरेको थियो ।
जिल्लाका विभिन्न विद्यालयका ३० जना खेल शिक्षकले भाग लिएको तालिम पाएकाहरुले विद्यालय तहमा पुगेर कुशल शिक्षण गर्ने प्रशिक्षण पाएको बताएका छन् । कार्यक्रममा जिल्ला खेलकुद विकास समितिका अध्यक्ष धनबहादुर परियारले अस्पताल बनाउनु भन्दा खेल मैदानमा लगानी गर्नुपर्ने धारणा राखे । विरामीलाइ उपचार गर्ने अस्पताल बनाउनु भन्दा अघि खेल मैदान बनाएर सबै नागरिकलाइ व्यायाम गर्न लगाएमा अधिकांस रोग लाग्दै नलाग्ने भएकोले खेल क्षेत्रमा लगानी बढाउन आवस्यक भएको बताए ।
फेडरेसनका जिल्ला अध्यक्ष बालकृष्ण शर्माको अध्यक्षता, प्रशिक्षक कृष्णप्रसाद कंडेलको संचालनमा सम्पन्न कार्यक्रममा सल्लाहकार रेशमबहादुर केसी र सहभागि बाबुल शर्माले आफ्नो धारणा राखेका थिए ।
पछिल्लो समय निजी विद्यालयहरुले अनिवार्य र सामुदायिक विद्यालयले पनि केही समयका लागि खेल शिक्षकको व्यवस्था गर्न थालेका छन् । कार्यक्रममा सहभागिलाइ प्रमाणपत्र वितरण समेत गरिएको थियो ।
संविधान दिवसका अवसरमा व्याडमिण्टन प्रतियोगिता
पहिलो संविधान दिवसका अवसरमा पर्वतमा कर्मचारी बीच व्याडमिण्डटन प्रतियोगिता सम्पन्न भएको छ । कर्मचारी मिलन केन्द्र पर्वतको व्यवस्थापनमा उक्त प्रतियोगिता सम्पन्न भएको हो ।
१ असोज देखि सञ्चालन भएको प्रतियोगितमा तेजसिंह थापाको समुह प्रथम, शिवराज बरालको समुह, द्धितीय, कृष्ण घर्ति मगरको समुह तृतीय र मञ्जु शिलाकारको समुह सान्त्वना भएका थिए ।
खेलमा विजयी प्रतियोगिहरुलाई सोमबार संविधान दिवस मुल समारोहका अवसरमा पुरस्कार तथा प्रमाणपत्र वितरण गरिएको थियो । प्रतियोगितामा पर्वतका विभिन्न कार्यालयमा कार्यरत कर्मचारीहरुको सहभागिता रहेको थियो ।