भारत भ्रमणमा राष्ट्रिय हितलार्इ नबिर्सन एमालेको सुझाव

काठमाडौं, २६ भदौ – एमालेले प्रधानमन्त्री पुष्पकमल दाहाल ‘प्रचण्ड’लाई भारत भ्रमणको क्रममा राष्ट्रिय हितलाई प्राथमिकतामा राख्न सुझाव दिने भएको छ ।
शनिबार बसेको एमाले स्थायी समिति बैठकले भारत भ्रमण अघि पार्टीको उच्चस्तरीय प्रतिनिधिमण्डलले प्रधानमन्त्री प्रचण्डलाई  भेटेर नेपाल तर्फबाट उठाउनुपर्ने विषयमा ध्यानाकर्षण गराउने निर्णय गरेको हो ।
शनिबार पार्टी मुख्यालय धुम्बाराहीमा बसेको स्थायी कमिटि बैठकबारे जानकारी दिदै पार्टी सचिव एवम् प्रचार विभाग प्रमुख योगेश भट्टराईले भने, ‘भ्रमणका बेला नेपालको राष्ट्रिय हितलाई पहिलो प्राथमिकतामा राखी नेपाल–भारत सम्बन्धलाई सुमधुर बनाउँदै नेपालका तर्फबाट उठाउनुपर्ने विषयवस्तुका बारेमा पार्टीको उच्चस्तरीय प्रतिनिधिमण्डलले प्रधानमन्त्रीलाई भेटी ध्यानाकर्षण गर्ने निर्णय गरेको छ ।’ त्यस्तै, बैठकमा केन्द्रीय कमिटी सदस्यको कार्यविभाजनको पुनसंयोजन, प्रदेश संगठन, कमिटीको नामावलीलाई अन्तिम टुंगो, पार्टी प्रवेश र त्यसको व्यवस्थापन, सल्लाहकार परिषद्मा सदस्यको मनोनयन तथा जेष्ठ कम्युनिस्ट मञ्च गठन, स्थानीय तहको पुनःसरंचनालगायत विषयमा छलफल हुने बैठकपछि जारी विज्ञप्तिमा उल्लेख छ । अर्को बैठक आइतबार १ बजे बस्ने छ ।