वनमा सेना छिर्न खोजेको भन्दै गाउँले रुष्ट

पर्वत, २५ भदौ – जिल्लाको कुश्मा नगरपालिका–७ दुर्लुंङबासीहरुले गाउँमा सेनाले बिना अनुमति फायरिंङ रेञ्ज खडा गर्न लागेको भन्दै विरोध जनाएका छन् । दुर्लुङ–७ चनौटेका स्थानीयबासीहरुले नेपाली सेनाले स्थानीय जग्गादाता समक्ष सहकार्य गरेपनि बन क्षेत्रमा सामुदायिक बनका उपभोक्ता समक्ष कुनै अनुमति नलिई फायरिंङ रेञ्ज खडा गर्न लागेको भन्दै विरोध गरेका हुन् । हाल पर्वत सदरमुकाम कुश्मा बजार नजिकै कुश्मा नगरपालिका–११ गोदामबाट सञ्चालन हुँदै आएको नेपाली सेनाको रण दल गुल्म कुश्मा नगरपालिका–७ दुर्लुंङमा स्थान्तरण गर्ने तयारी भइरहेको छ । नेपाली सेनाले गुल्म स्थान्तरणका लागि आवश्यक जग्गा खरिद गरेर अन्य प्रक्रिया अघि बढाइसकेपछि स्थानीयबासीहरुले विरोध गरेका हुन् । स्थानीय चनौटे सामुदायिक वन उपभोक्ता समुहका उपभोक्ताहरुले सामुहिक रुपमा छलफल गरी दुर्लुंङको गिजेत भन्ने स्थानमा नेपाली सेनाले सञ्चालन गर्न लागेको फायरिंङ रेञ्ज कुनैपनि हालतमा मान्य नहुने निर्णय सहित आवश्यक सहयोगका लागि सरोकारवाला निकाय समक्ष धाएका छन् । उनीहरुले चनौटे सामुदायिक वन क्षेत्रमा सुचिकृत लोपोन्मुख सालक, ३६ प्रकारका चराचुरुंगी, १६ भन्दा बढी प्रजातिका जिवजन्तु, बाघ, चरी बाघ लगायतका महत्वपूर्ण बन्यजन्तु पाइनुका साथै विभिन्न पर्यटकीय सम्भावना बोकेका स्थलहरु समेत रहेकाले उक्त स्थानमा फायरिंङ रेञ्ज राख्न नहुने माग रहेको छ । बन समुहका अध्यक्ष नरजंग गुरुङ उक्त मागसहित सहयोगका लागि जिल्ला वन कार्यालय पर्वतमा अनुरोध गरेको र सबै समुदायहरु सामुदायिक वनको रक्षाका लागि एक भएर लागेको बताए । बन समुहका उपभोक्ताहरुले उक्त बन क्षेत्रमा अवस्थित महभिर छहरामा साहसिक खेल क्यानोनिंङ समेत सञ्चालन गर्ने तयारी गरेको बताउँदै सेनालाई कुनैपनि हालतमा उक्त जग्गा उपलब्ध हुन नदिने निर्णय गरेका छन् । यता गुल्मपति बालकृष्ण कार्कीले भने स्थानीयबासी र जग्गादातासँग सहकार्य र सम्झौता गरेर नै फायरिङ रेञ्ज सहितको तालिम केन्द्र स्थापना गर्न लागेको बताए । उनले स्थानीय ४० भन्दा बढी जग्गादातासँग मञ्जुरी लिएर मात्रै २ सय रोपनी जग्गा लिने सम्झौता भइसकेको बताए । सेनाले क्याप सञ्चालनका लागि कुश्मा नगरपालिका–६ दुर्लुङमा भने जग्गा खरिद गरी क्याम्प खडा गर्ने प्रक्रिया अघि बढाइसकेको छ ।