बागलुङ, २० भदौ – जिल्लाको हटिया गाविस–३ का गुमानसिँह खत्रीले कृषि पेसाबाटै लाखौ आम्दानी गर्न सफल भएका छन् ।
२०५२ सालदेखि कुखुरापालन सुरु गरेका खत्रीले २०६३ सालदेखि कुखुरासँगै गोलभेडा खेती समेत गर्दै आएका छन् । गलकोट दुदिलाभाटी–५ टोड्केमा जन्मिएका खत्रीले २०५२ देखि २०५७ सालसम्म गाउँकै गाजा प्राथमिक बिद्यालयमा अध्यापन गराएका थिए ।
सुरुमा कुखुरापालन पेसाबाट सोचेजस्तो आम्दानी नभएपछि २०६२ सालमा खत्रीले बिदेश जाने सोच बनाएको बताए । बिदेश जाने भिसा नलागेपछि खत्रीले गाउँमा कुखुरापालन ब्यवसाय र तरकारी खेती हटियामा सुरु गरेका थिए ।
प्लाष्टिक टनेल भित्रको गोलभेडा खेतीबाट राम्रो आम्दानी हुन थालेपछि बिदेशको मोह कम हुदै गएको खत्रीले बताए । १० बर्षदेखि तरकारी खेती गर्दै आएका खत्रीले तरकारी र कुखुरापालन ब्यवसायबाट बार्षिक ४ देखि ५ लाखसम्म आम्दानी गर्दै आएको बताए ।
रोजगारीका लागि विदेश जानका लागि हिडेका खत्री गाउँमै पशुपालन र व्यावसायिक रुपमा तरकारी तथा फलफूल खेतीमा लागेपछि खत्रीको जिवननै फेरिएको छ ।
विदेश जाने रहर बनाएका खत्रीले गाउँमै मेहेनत गर्न सकेमा रोजगारी गर्न विदेशिनु पर्दैन भन्ने उदाहरण समेत दिएका छन् । खत्रीले हरिचौरको जामुनडाडाँमा बार्षिक ७० हजार दिने गरि जग्गा भाडामा लिनुभएको छ ।
खत्रीले ३ जना ब्यक्तिलाई मासिक १० देखि १२ हजार दिने गरि रोजगारी प्रदान गरेका छन् । गलकोट माध्यामिक बिद्यालय ब्यवस्थापन समिति, कृषि बिकास समिति हटिया लगायतमा खत्रीले अध्यक्षको भुमिका निर्वाह गरेका छन् । खत्री राष्ट्रिय जनमोर्चा हटिया गाउँ पार्टीका सचिव समेत हुन ।
