बेगबासीलाई सहयोग जुटाऔं

वर्षायाम सकिनै लाग्दा बेगखोलाबासी प्राकृतिक विपत् झेल्न बाध्य भएका छन् । गत बिहीबार राती आएको बाढीले बेगखोलाका ११ वटा घर बगाउँदा ४८ जना विस्थापित भएका छन् । तीमध्ये एकजनाको अवस्था अझै थाहा हुन सकेको छैनभने पीडितहरुलाई बारीमा अस्थायी टहरा निर्माण गरी राखिएको छ । यसअघि बाढी र पहिरोले बागलुङ र म्याग्दीमा ठूलो धनजनको क्षति भएको छ । बाढी र पहिरोले विनाश निम्त्याईरहेका बेला म्याग्दी जिल्लाका बेगखोलाबासीले बाढीको सामना गर्नु परेको छ । बेगखोलामा आएको बाढीले ११ घर परिवारलाई विस्थापित गराएको छ । बाढीले मानवीय क्षति पनि निम्त्याएको छ । बेगबासी अहिले बाढीले दिएको सास्तीबाट आक्रान्त भएर जीवन गुजारिरहेका छन् । बाढीले उनीहरुको उठबास मात्रै लगाएको छैन घरमा भएको अन्नपात पनि नष्ट गरिदिँदा उनीहरु भोको पेट बाँच्नु परेको छ । उनीहरुलाई अहिले सबैभन्दा बढी सहयोगको जरुरी छ । एक मानवलाई विपत् पर्दा अर्काे मानवले सहयोग गर्नु नै हाम्रो दायित्व हो । यो दायित्वबाट कोही पनि बिमुख हुनु हुँदैन ।
बेगखोला बाढी पीडितलाई सहयोग जुटाउनको लागि अहिले म्याग्दीमा सामाजिक संघ संस्थासंगै राजनीतिक दलहरु पनि सक्रिय भएर लागेका छन् । जुन अभियान प्रशंसनिय छ । भोट मात्रै माग्ने राजनीतिक दलका नेताहरु अहिले सामाजिक काममा सक्रिय हुनु निकै नै स्वागतयोग्य छ । म्याग्दीका सामाजिक संघ संस्था र राजनीतिक दलले देखाएको उदारताको पाठ सिक्दै हामी छिमेकी जिल्ला बागलुङले पनि सहयोग संकलन अभियान संचालन गर्न जरुरी छ । अहिलेसम्म मिलन म्याग्दीले बेगखोला बाढी पीडितलाई ८० हजार रुपैयाँ बराबरको लत्ताकपडा सहयोग गरेको छ । बाढीबाट पीडित बनेका ११ घरधुरीका प्रतिसदस्यलाई एकएक जोर लत्ताकपडा र चप्पल सहयोग गरेको छ । बाढी पीडितलाई सहयोग गर्नको लागि अहिले म्याग्दीमा व्यक्ति व्यक्तिले सहयोग संकलन अभियान शुरु गरेका छन् । हरेक नागरिकले थोरै भएपनि रकम अथवा जिन्सी सहयोग गरेमा बेगबासीको पीडामा मल्हम लाग्ने निश्चित छ । त्यसैले व्यक्ति व्यक्ति मिलेर विपत्मा परेकालाई सहयोग जुटाउन अभियानको थालनी गर्नुपर्छ ।
बेगखोलाबासीलाई पोखरेली क्रिश्चियन समुदाय म्याग्दीले बाढीपीडितलाई लक्षित गरी ७५ हजार रुपैयाँ बराबरको सहयोग गरेको छभने नेकपा एमाले म्याग्दीले नगद ३५ हजार रुपैयाँ सहयोग हस्तान्तरण गरेको छ । राजनीतिक दलका नेतासंगै पार्टीका अन्य पदाधिकारी र विभिन्न तहमा रहेका व्यक्तिहरुबाट दुईहजार, एकहजार पाँचसय र एकहजार रुपैयाँका दरले सहयोग उपलब्ध भएको छ । हामी नेपाली एकलाई पीडा हुँदा अर्काे सहयोग गर्ने प्रचलनको शुरुवात गरेका छौ । जसको सबैबाट प्रशंसा समेत भएको छ । अब फेरि यसलाई निरन्तरता दिई बेगबासीलाई सहयोग जुटाउनु पर्छ ।