हाम्रा लागि पृथ्वी निकै सानो – स्टेफेन हकिङ

स्टारमस साइन्स फेस्टिवलमा बोल्दै हकिङ
काठमाडौं, ७ असार – प्राध्यापक स्टेफेन हकिङले मानव जातिले जीवित रहन पृथ्वी छोड्नै पर्ने बताएका छन्। नर्वेको ट्रोन्हेमस्थित स्टारमस साइन्स फेस्टिवलमा बोल्दै मानिसले पृथ्वी छोडेर अन्य ग्रहमा बस्ती बसाउन थाल्नुपर्ने बताएका हुन्। उनले चन्द्रमा तथा मंगल ग्रहमा बस्ती बसाउने कुरा मानव जातिको भविष्यका लागि निकै महत्वपूर्ण भएको बताए। उनले कुनै न कुनै समय तापक्रम वृद्धि, जनसंख्या विस्फोट वा क्षुद्रग्रहसँग ठोक्किएर पृथ्वी बस्नलायक स्थान नरहने दाबी पनि गरे।
‘मानिसले पृथ्वी छोड्नै पर्ने कुरामा म विश्वस्त भएको छु। पृथ्वी हाम्रालागि निकै सानो हुन थालिसक्यो। हाम्रा भौतिक स्रोतहरु खतरनाक दरमा समाप्त हुँदैछन्,’ हकिङले भने, ‘इतिहासमा जब हामी यस्तै संकटमा पुगेका थियौँ, त्यसबेला उपनिवेश बनाउने कुनै अर्को स्थान खोजिएको थियो। १४९२ मा कोलम्बसले यसैगरी नयाँ विश्व पत्ता लगाएका थिए। तर अब नयाँ विश्व कहीँ बाँकी छैन। हामीलाई ठाउँ कम भइरहेको छ र जाने ठाउँ भनेको अरु ग्रह नै हो।’
उनले कुनै न कुनै दिन क्षुद्र ग्रह पृथ्वीमा ठोक्किने दाबी पनि गरे। त्यस्तै अन्य ग्रहमा फैलिँदा मानवताको भविष्यमा पूर्ण परिवर्तन आउने उनले बताए। ‘जता गए पनि हामीले त्यहाँ सभ्याता निर्माण गर्नुपर्ने हुन्छ। नयाँ पारिस्थितिक प्रणाली स्थापना गर्नुपर्ने हुन्छ र त्यहाँसम्म लाखौँ मान्छे, जनावर, रुखबिरुवादेखि लिएर किराफट्यांग्रा र जीवाणुहरु ओसार्नुपर्ने हुन्छ।’हकिङले मानिसले उपनिवेश बसाउन सुरु गर्नका लागि चन्द्रमा र मंगलग्रह सबैभन्दा उत्तम स्थान भएको बताए। उनले चन्द्रमामा ३० वर्षमा र मंगलग्रहमा ५० वर्षमा शिविर खडा गर्न सकिने पनि उनको दाबी थियो। यद्यपि उनले सौर्यपरिवारबाहिर पनि मानिसले बस्ती बसाउनुपर्ने सुझाए।
सम्बोधनका क्रममा हकिङले रुसी अर्बपति युरी मिल्नरसँगको सहकार्यमा सबैभन्दा नजिकको अर्को सौर्य प्रणाली अल्फा सेन्चुरीमा आणविक शक्तिबाट सञ्चालित र प्रकाशबाट चालित सूक्ष्म खोजी अभियान पठाउन लागेको जानकारी पनि दिए। एजेन्सी