काठमाडौं, ७ असार – उपप्रधान तथा परराष्ट्रमन्त्री कृष्णबहादुर महरासँग नेपाल भ्रमणमा रहेको चिनियाँ प्रतिनिधिमण्डलले भेट गरी दुई देशबीचको आपसी सम्बन्ध तथा चासोका विषयमा छलफल गरेको छ। परराष्ट्र मन्त्रालयमा बुधबार भएको भेटवार्तामा नेपाल र चीनबीचमा भएका सम्झौतालाई कार्यान्वयन गरेर अगाडि बढ्ने र आगामी दिनमा आपसी सम्बन्धलाई प्रगाढ बनाउँदै लैजाने छलफल भएको छ।
सो अवसरमा परराष्ट्रमन्त्री महराले चीनसँग भएका महत्वपूर्ण सम्झौताहरु पारवहन तथा यातायात, बेल्ट एण्ड रोड इनिसियटिभस्, क्रस बोर्डर इकोनोमिक जोन जस्ता सम्झौता दुई पक्षबीच छलफल गरेर कार्यान्वयन गर्दै जाने प्रतिबद्ध जनाए।
मन्त्री महराले चिनियाँ प्रतिनिधिमण्डल समक्ष चिनियाँ उद्योगी व्यवसायीको प्रतिबद्धताअनुसार ८ दशमलव ३ अर्ब अमेरिकी डलर बराबरको लगानी चाँडै आउने विश्वास व्यक्त गरे। महराले स्वतन्त्र व्यापार सम्झौता (एफटिए) सम्बन्धी प्रावधानले नेपालको व्यापार घाटा कम गर्न, उत्पादन वृद्धि गर्न र निर्यात वृद्धि गर्न सहयोग गर्ने विश्वास पनि व्यक्त गरे।
नेपाललाई चीनले ५१२ वटा वस्तुमा दिएको शून्य भन्सार महसुलका कारण पनि व्यापारमा नेपालले फाइदा लिन सकेको महराको भनाइ थियो। मन्त्री महराले पर्यटन प्रवद्र्धनका लागि दुवै मुलुकबीच पहल गरेर अगाडि बढ्ने उल्लेख गरे।
नेपालको वर्तमान राजनीतिक अवस्थाबारे जानकारी दिँदै महराले संविधान कार्यान्वयनका सिलसिलामा पहिलो चरणको निर्वाचन शान्तिपूर्ण तवरले सम्पन्न भएको र दोस्रो चरणको निर्वाचन अगाडि बढ्ने क्रममा रहेको बताए। मन्त्री महराले सबै निर्वाचन तोकिएको समयमै सम्पन्न हुने विश्वास पनि दिलाए।
नेपाल एक चीन नीतिप्रति प्रतिबद्ध रहेको उल्लेख गर्दै उनले द्विपक्षीय सम्बन्ध आपसी विश्वास, समझदारी र पञ्चशीलका आधारमा अगाडि बढ्ने बताए। मन्त्री महराले परम्परागतरुपमा हुँदै आएको दुई देशबीचको उच्चस्तरीय भ्रमणलाई निरन्तरता दिन आग्रह गरे। मन्त्री महराले आफ्ना समकक्षी तथा चिनियाँ विदेशमन्त्री वाङ यीलाई नेपाल भ्रमणको निमन्त्रणा दिएका छन्।
जवाफमा प्रतिनिधि मण्डलका प्रमुख तथा सहायक विदेशमन्त्री क्वाङ सुयानयुले नेपालले ओबोरमा हस्ताक्षर गरेसँगै नेपाल–चीनबीचको सम्बन्ध नयाँ ‘फ्रेम’ मा अगाडि बढेको बताए। दुई मुलुकबीच आपसी समझदारी, विश्वास र सद्भावका आधारमा सम्बन्ध प्रगाढ बन्दै गरेको उनको भनाइ थियो।
नेपाल–चीनबीचको संयुक्त परामर्श संयन्त्रको बैठक फलदायी भएको बताउँदै क्वाङले आउँदा दिनमा दुई देशबीच भएका सम्झौता कार्यान्वयनको चुनौती रहेको विचार व्यक्त गरे। साथै उनले सम्झौता कार्यान्वयनमा आफ्ना सरकारी संयन्त्र परिचालन गर्ने प्रतिबद्धता पनि जनाए।
‘ओबोर अगाडि बढाउने क्रममा नेपाल एक महत्वपूर्ण मुलुक रहँदै आएको छ’, सहायक मन्त्री क्वाङले भने, ‘र यस कार्यमा नेपाल प्रतिवद्ध भएर अगाडि बढ्छ भन्ने चीनको विश्वास छ।’ सहायक मन्त्री क्वाङले यसै वर्ष चीनको उच्चस्तरको भ्रमण गराउने प्रयास भइरहेको जानकारीसमेत मन्त्री महरालाई दिएका छन्।
उनले पराराष्ट्रमन्त्री महरालाई चिनियाँ विदेशमन्त्री वाङ यीको बधाई तथा शुभकामना सन्देश सुनाउँदै सक्दो चाँडो चीन भ्रमणको निमन्त्रणा दिए। बैठकमा परराष्ट्र मन्त्रालयका उच्चअधिकारी तथा नेपालका लागि चिनियाँ राजदूत यु होङलगायतका प्रतिनिधिको सहभागिता थियो।
मङ्गलबार सम्पन्न संयुक्त परामर्श संयन्त्रको एघारौँ बैठकमा भाग लिन चिनियाँ प्रतिनिधिमण्डल नेपाल आएको हो। उक्त प्रतिनिधिमण्डलले बुधबार नै प्रधानमन्त्री शेरबहादुर देउवासँग छलफल गरी बिहिबार बेइजिङ फर्कने कार्यक्रम रहेको छ। रासस
