म्याग्दीमा क्रियाशील पत्रकार तथा सञ्चारकर्मीहरुका लागि परिवर्तित सन्दर्भमा न्यू मिडिया सम्बन्धी विषयमा तालिम सम्पन्न भएको छ ।
नेपाल पत्रकार महासंघ जिल्ला शाखा म्याग्दीको आयोजना र बेनी नगरपालिकाको आर्थिक सहयोगमा पत्रकारहरुलाई लक्षित गरेर तालिम सञ्चालन गरिएको हो । बुधवार र बिहीबार जिल्लाको पर्यटकीय क्षेत्र टोड्के पुगेर पत्रकारलाई क्षमता विकासमा न्यू मिडियाको भूमिकाबारे तालिम प्रदान गरिएको पत्रकार महासंघ म्याग्दी शाखाले जनाएको छ ।तालिमको बेनी नगरपालिकाका नगर प्रमुख सुरत केसीले उद्घाटन गर्नुभएको थियो । तालिमको उद्घाटन गर्दै उहाँले प्रविधिको बढ्दो प्रयोग भैरहेको वर्तमान अवस्थामा पत्रकार आफू पनि परिवर्तन भएर अगाडि बढ्नुपर्नेमा जोड दिनुभयो ।
प्रशिक्षणात्मक मन्तव्यसहित नगर प्रमुख केसीले आफू विगतमा पत्रकारिता क्षेत्रमा क्रियाशील रहँदाको अनुभव सुनाउँदै अहिलेको समय विज्ञान र प्रविधिको युग भएकाले युग सुहाउँदो पत्रकारिता गर्नुपर्ने धारणा राख्नुभएको थियो ।उहाँले बेनी नगरपालिकाले समग्र नगर क्षेत्रको विकास निर्माणसँगै धार्मिक तथा पर्यटकीय गन्तव्यका क्षेत्रहरुको पहिचान, पूर्वाधारको विकास तथा पर्यटन प्रवद्र्धनमा जोड दिएको बताउनुभयो ।
तालिम उद्घाटनसत्रमा बेनी नगरपालिका–१०, पात्लेखेतका वडा अध्यक्ष मसविर रोका, रघुगंगा गाउँपालिका–५, झिँका वडाध्यक्ष मनबहादुर शेरमन्जा र टोड्के हिल रिसोर्ट प्रालिका सस्थापक÷सञ्चालक भीम शेरचनले मन्तव्य व्यक्त गर्दै टोड्केमा आयोजित पत्रकारहरुको तालिमले यस क्षेत्रको पर्यटन प्रवद्र्धमा महत्वपूर्ण सहयोग पुग्ने अपेक्षा गर्नुभएको छ ।
तालिमको उद्घाटनसत्र पत्रकार महासंघ म्याग्दीका अध्यक्ष प्रकाश पौडेलको अध्यक्षता, उपाध्यक्ष हरिकृष्ण गौतमको स्वागत र सचिव सन्तोष गौतमको सञ्चालनमा सम्पन्न भएको थियो । दुई दिनसम्म चलेको तालिमको पोखराका पत्रकार एवं समाधान दैनिकका सम्पादक केशवसरण लामिछानेले समाचारलेखन, वर्तमान अवस्थामा न्यू मिडिया सम्बन्धी पत्रकारिता, यसको प्रयोग र महत्व, फिचरलेखनलगायत विविध विषयहरुमा सहजीकरण गर्नुभएको थियो ।तालिमको समापन गर्दै महासंघका अध्यक्ष पौडेलले आगामी दिनमा पनि पत्रकारहरुको क्षमता विकाससँगै नयाँनयाँ विषयहरुलाई केन्द्रीत गरेर पत्रकारिता तालिम सञ्चालन गरिने बताउनुभयो । तालिमको सुरुवाती दिन बुधवार साँझ टोड्केमा विविध सांस्कृतिक कार्यक्रमको समेत आयोजना गरिएको थियो ।
