नेकपा एमाले बेनी नगर कमिटीले पालिका भित्रका वडाहरको अधिवेशनको मिति तय गरेको छ ।
नेकपा एमाले नगरकमिटी अध्यक्ष बेलबहादुर कटुवालका अनुसार वडा नम्बर १ रत्नेचौरको अधिवेशन २४ चैतमा गर्ने भएको छ । त्यस्तै २ नम्बर वडाको अधिवेशन चैत २९ गते, ४ नम्बरको चैत २८ गते, ५ को २९ गते, ६ को २७ गते, ७ को २२ गते, ८ को २४ गते एवम् वडा नम्बर ९ र १० को २२ गते वडा अधिवेशन गर्ने निर्णय भएको छ । नगरकमिटीको बैठकले अन्य विविध पक्षमा गहल छलफल संगै निर्णय गरेको समेत उहाँले जानकारी दिनुभयो ।
नगरकमिटीको बैठकमा गण्डकी प्रदेश कमिटीका सदस्य हरिकृष्ण श्रेष्ठले पार्टीको मुल ध्येयलाई संस्थागत गर्न सबै लाग्नु पर्ने धारणा राख्नु भएको थियो । उहाँले एमाले जनताको पार्टी रहेको र पार्टीको लक्ष्य प्राप्तीका लागि सबै तह र तप्काबाट जिम्मेवार तबरले लाग्नु पर्ने उहाँको कथन थियो ।
नेकपा एमाले म्याग्दीका अध्यक्ष बालकृष्ण सुवेदीले जनवादी केन्द्रीयताका आधारमा एमाले अगाडी बढ्ने बताउनुभयो । उहाँले तल्लो कमिटीहरु माथिल्लो कमिटीको मातहत रहने र माथिल्लो कमिटी महाधिवेशनको मातहतमा रहने बताउँदै महाधिवेशन पनि जनताबाट चुनिएका प्रतिनिधिको भेला भएको हुनाले एमाले जनकेन्द्रीत पार्टी रहेको धारणा राख्नु भएको थियो । माघमा जिल्ला अधिवेशन सकिएपछि फागुनमा पालिका अधिवेशन सकेको एमालेले चैत भित्र जिल्लाका ४५ वटै वडाको अधिवेशन गर्ने लक्ष्यका साथ अगाडी बढेकोले सबैले त्यसलाई मुर्तरुप दिन लाग्नु पर्ने उहाँको भनाई थियो ।
कार्यक्रम नेकपा एमाले बेनी नगरकमिटीका अध्यक्ष बेलबहादुर कटुवालको अध्यक्षता, सचिव भोजबहादुर रिजालको सञ्चालनमा भएको थियो ।
