क्रिकेट संघ म्याग्दीको अगुवाइमा शुरु भएको बेनी क्रिकेट र रत्नेचौर क्रिकेट क्लब बीचको तीन खेलको सिरिज १–१ को बराबरीमा पुगेको छ ।
क्रिकेट संघ म्याग्दीका अध्यक्ष प्रविण पौडेलका अनुसार गत हप्तादेखि शुरु भएको क्रिकेट सिरिज एकएकको बराबरीमा पुगेको हो । फागुन २६ गते बेनी नगरपालिका–१ रत्नेचौरमा भएको पहिलो खेल रत्नेचौरले जित हासिल गरेको थियो । चैत ३ गते शनिबार बेनी नगरपालिका–५ चुत्रेनीमा भएको दोश्रो खेल बेनी क्रिकेटले ५ विकेटले विजयी भए सँगै खेल एकएकको बराबरीमा पुगेको हो । सिरिजको अन्तिम खेल आगामी १० गते शनिबार रत्नेचौरमा हुने संघका अध्यक्ष पौडेलले जानकारी दिनुभयो । विजयी हुने टिमले ट्रफि तथा मेडल प्राप्त गर्ने उहाँको भनाई छ ।
निर्धारीत ४० ओभरको खेलमा पहिला ब्याटिङ गरेको रत्नेचौरले ३२ ओभरमा १० विकेट गुमाएर १५० रन बनाएको थियो । एक सय ५१ रनको बिजय लक्ष्य लिएर मैदान उत्रिएको बेनीले ५ विकेटको क्षतीमा लक्ष्य पुरा गरेको थियो । बेनीका लागि असोक कार्कीले सर्वाधिक ४० रन बनाउनु भएको थियो भने शिशिर दगामी मगरले २७ रन जोड्नु भएको थियो । रत्नेचौरका लागि सन्तोष क्षेत्री, जीवन पौडेल र जेनीस आचार्यले एकएक विकेट लिनु भएको थियो भने दुई खेलाडी रनआउट भएका थिए ।
त्यस्तै रत्नेचौरका पुस्कर रिजालले २७ रन र जीवन पौडेलले २६ रन बनाउनु भएको थियो । बेनीका असोक कार्कीले तीन विकेट लिनु भएको थियो भने राजेश खत्री र सचिन कार्कीले दुई दुई विकेट लिनु भएको थियो ।
क्रिकेट संघ म्याग्दीको अगुवाइमा बेनी नगगरपालिका–१ रत्नेचौर तथा बेनी नगरपालिका–५ चुत्रेनीमा नियमित क्रिकेट खेल्न थालिएको छ । अभ्यासका लागि बेनी बजारको खुल्ला मञ्चमा नेट तयार गरीएको र हरेक हप्ता एक हप्ता बिराएर रत्नेचौर तथा चुत्रेनीमा नियमित खेल हुँदै आएकोमा दुवै टिमको सल्लाह बमोजिम तीन खेलको सिरिज थालिएको पौडेलले बताउनुभयो । उहाँले भन्नुभयो–‘हामी सामान्यतया २०÷२० ओभरको खेल खेल्ने गरेको भएपनि अहिले ४० ओभरको तीन खेलको सिरिज थालेकोमा एकएकको बराबरीमा सिरिज पुगेको र अर्को शनिबार हुने फाइनल खेल पछि बिजेताको टुंगो लाग्ने छ ।’
