बुटवल, २० मंसिर – पाँच नम्बर प्रदेश विभाजन गर्ने गरी सरकारले संसदमा दर्ता गराएको संविधान संशोधन प्रस्तावको विरोधमा रुपन्देहीमा चलिरहेको आन्दोलनको छैठौं दिनको माहोलमा भने केही फरकपन आयो। सोमबार विहानै प्रदर्शनमा जुटेका नागरिकहरु दिउँसो सांगीतिक माहोलमा झुमे।
लोक गायक बद्री पंगेनीसहितका केही कलाकार दिउँसो बुटवलको मिलनचोकस्थित ट्राफिक आइल्याण्डमा चढे र गाउन थाले–‘शान्ति क्षितिज पारी छ, आन्दोलन अझै जारी छ…।’ पंगेनीको गीतले बुटवलको मिलनचोक सांगीतिक माहोल तातियो। छरिएर रहेका नागरिकहरु एकत्रित भए। गायक पंगेनीले गाउन अझै छाडेनन्।
प्रदेश नम्बर पाँचको आन्दोलनमासाथ दिन आफू बुटवल झरेको बताउँदै उनले गीतको टुक्का जोडे–‘अघि बढ ५ नम्बर प्रदेश हामी साथ दिन्छौं, माग पूरा भएपछि बल्ल विश्राम लिन्छौं…।’ प्रदर्शनमा सहभागीहरु पंगेनीको गीतमा छमछमी नाचे । ‘अझै नि लोकतन्त्र आको छैन है…, गाउँदै पंगेनीले गीत टुङ्ग्याए। चिसिएको बुटवलको मौसम गायक पंगेनीसंगको गीतसँगै एकाएक तातियो। लोकगायक पंगेनीलाई रुपन्देहीका स्थानीय कलाकारले पनि साथ दिएका थिए।
दोहोरी गायक/गायिकाहरु दीपक गरौजा, वीपी परियार, रुपा जिएम, विष्णु जी पाण्डे, पुरुषोत्तम भण्डारी, प्रकृति ढकाल, उज्ज्वल गिरीले पनि स्वरमा स्वर थपे। भैरव युवा क्लवले सडकमै मञ्चको तयार गरेको थियो। सांगीतिक कार्यक्रम चलिरहँदा बुटवलको मिलनचोकमा हजारौं नागरिकहरु सहभागी थिए। पाँच नम्बर प्रदेश विभाजन गर्ने गरी सरकारले संसदमा दर्ता गराएको संविधान संशोधन प्रस्तावको विरोधमा भइरहेको प्रदर्शनको छैठौं दिन भने रुपन्देही शान्तिपूर्ण बन्यो।
