धौलागिरी हिमालाई आफ्नै नाङ्गो आँखाले देख्न सकिने रमणीय स्थल लभ्ली हिल पुग्ने आन्तरीक पर्यटकहरु भुइभरी छरिएका फोहोर पनि हेरेर फर्कने गरेका छन् । म्याग्दी सदरमुकाम बेनी देखि नजिकै रहेको पर्यटकीय महत्वको स्थल लभ्लीहीलमा फोहोर ब्यवस्थापन हुन पर्यटकहरुले समेत त्यसको पनि दृष्यावलोकन गरेर फर्कने गरेका छन् ।
सदरमुकाम बेनीदेखि आधा घण्टाको पैदल यात्रामा पुगीने लभ्ली हिल पछिल्लो समय दृष्यावलोकनका लागि एवम् सामाजिक सञ्जालका लागि फोटो तथा भिडियो खिच्नका लागि निकै आकर्षक गन्तव्य हो । त्यही गन्तव्यमा अहिले फोहोर थुप्रदा सुन्दरतामाथि नै औंला उठाए जस्तो देखिने गरेको छ । यता उता छरिएका चाउचाउ तथा बिस्कुटका खाली खोल, पानीका बोत्तल मात्रै होइन मदिरा तथा बियरका खाली सिसिले पनि सुन्दरतालाई कुरुप बनाएको छ ।
लभ्लीहिलमा पुग्नु भएका हरि छन्त्यालले फोहोर व्यवस्थापन उचित तबरले गरेको खण्डमा सुन्दतालाई अझै निखार मिल्ने बताउनुभयो । उहाँले भन्नुभयो–‘खाने कुरा खाए पछि त्यसलाई व्यवस्थापन गर्ने काम कुनै पनि ठाउँमा पुग्नेहरुको हो यदि उनीहरुले गरेनन् भने पनि त्यसको उचित संरक्षण र सम्बद्र्धन व्यवस्थापनले गर्नु पर्ने हुन्छ ।’ लभ्ली हिललाई पार्क शैलीमा निर्माण प्रयास भएको भए पनि त्यसलाई थप व्यवस्थीत गर्नका लागि भने अरु कुनै समिति तथा उपसमितिहरु नबन्दा जिम्मेवारी कस्ले लिने भन्ने दुविधाले गर्दा पनि फोहोर थुप्रदै गएको बताइन्छ ।
बेनी नगरपालिका–२ मा पर्ने लभ्ली हिल सँगै रहेका अगुवा कृषक चन्द्रबहादुर कार्कीले आन्तरीक तथा बाह्य पर्यटकहरु लभ्ली हिल आउने र खानेकुरा खाए पछि त्यसको फोहोर जथाभावि फाल्दा समस्या भएको बताउनुभयो । कहिलेकाँही म आफै पनि यहाँ सरसफाइका लागि प्रयास त गर्छु तर एक्लै गर्न अलिक गाह्रो हुने भएकाले समस्या भएको छ उहाँले थप्नुभयो ।
लभ्ली हिल संरक्षणका लागि नगरपालिकाबाट चालु आर्थिक वर्षमा १५ लाख रुपियाँ छुट्याएको बेनी नगरपालिका–२ का अध्यक्ष यामबहादुर क्षेत्रीले बताउनुभयो । लभ्ली हिललाई व्यवस्थीत गर्ने र सुन्दर बनाउने लक्ष्य सहित गठन भएको लभ्लीहिल संरक्षण समितिले सक्रिय तबरले राम्रो संग काम गर्न नसकेको हुँदा पनि फोहोर व्यवस्थापन हुन सकेको छैन । लभ्लीहीलमै होटल सञ्चालन गर्नका लागि जग्गा भाडामा नगरपालिकाले दिए पछि बनेको संरचनामा पनि अहिले व्यवसाय समेत चल्न नसक्दा समस्या भएको उहाँले बताउनुभयो । होटल सञ्चालन भएको खण्डमा होटलकै व्यवस्थापकलाई नै फोहोर व्यवस्थापन गर्न पनि लगाउने प्रयास गरिएको अध्यक्ष क्षेत्रीले बताउनुभयो । फोहोर व्यवस्थापन गर्न केही कठिन भएको भए पनि त्यसलाई थप योजना बनाएर संरक्षण गर्नुका साथै थप योजना बनाएर अगाडी बढ्ने तयारी गरीएको उहाँले बताउनुभयो ।
लभ्ली हिल संरक्षणका लागि त्यही क्षेत्रमा शुल्क उठाउने र त्यही स्थानको संरक्षण सम्बद्र्धन गर्नका लागि बेनी नगरपालिकालाई आग्रह गर्दा नगरपालिकाबाट सुनुवाई नहुँदा समस्या भएको स्थानीय बताउछन् । वडा अध्यक्ष क्षेत्रीले पनि वडाले आफैले कुनै राजश्व संकलन गरेर वडाकै बिकास गर्न खोज्दा पनि कानुनी समस्याले गर्दा नमिल्ने हुँदा लभ्ली हिल सदरमुकाम नजिकै रहेको निकै आकर्षक गन्तव्य हुँदाहुदै पनि त्यसको उचित प्रयोग समेत हुन नसकेको बताउनुहुन्छ ।
