हिमाली जिल्ला म्याग्दीको बेनी नगरपालिका–२ गौंस्वाराका आनन्द रिजाल र लमजुङ घर भई हाल अमेरिकामाा रहेकी आयारा घिमिरेले अनाथ बालबालिकाहरुलाई शैक्षिक पोशाक तथा खाद्यान्न सहयोग गर्दै आफ्नो जन्मदिन मनाउनु भएको छ ।
बाहिर देखावटी भन्दा पन केही सन्देश दिने तबरले आफ्नो जन्मोत्सव मनाउने क्रममा बाल संगठन म्याग्दीले सञ्चालन गरेको बालगृहमा रहेका १० जना अनाथ बालबालिकाहरुका लागि खाद्यान्न र शैक्षिक पोशाक प्रदान गर्नुभएको बाल संगठनका सदस्य हरिकृष्ण गौतमले बताउनुभयो ।
जिल्ला प्रशासन कार्यालय म्याग्दीमा सवारी चालकको रुपमा कार्यरत आनन्द रिजाल र उहाँकी भान्जी आयारा घिमिरेले बालगृहका १० जना बालबालिकालाई शैक्षिक पोशाक (स्कुल ड्रेस) र आवश्यक खाद्यान्न साम्रागी सहयोग गर्नुभएको हो । सोमबार प्रमुख जिल्ला अधिकारी तुलसरीराम पौडेलको उपस्थितिमा बाल संगठनका अध्यक्ष राजेश शाक्य र उपाध्यक्ष ज्ञानेन्द्र श्रेष्ठलाई सामग्री हस्तान्तरण गरिएको थियो । हस्तान्तरण पछि बोल्दै प्रजिअ पौडेलले मानवीय सेवाको क्षेत्रमा सहयोग गर्ने नै बास्तविक सहयोगदाता भएको बताउनुभयो ।
रिजालले हरेक बर्ष आफ्नो जन्मदिनमा समाजका विभिन्न क्षेत्रमा सहयोग गर्ने क्रममा यस वर्ष अनाथ बालबालिकाहरुका लागि सहयोग गरेको बताउनुभयो । सहयोग हस्तान्तरण कार्यक्रमको अध्यक्षता बालसंगठनका अध्यक्ष राजेश शाक्य र सञ्चालन कार्यसमिति सदस्य हरिकृष्ण गौतमले गर्नुभएको थियो ।
