६६ औं राष्ट्रिय सहकारी दिवसको अवसरमा पवित्र धार्मिक स्थल गलेश्वरधाममा रहेको जेष्ठ नागरिक आश्रमलाई आर्थिक सहयोग गरीएको छ । हिमाली जिल्ला म्याग्दीको बेनीमा रहेको बेनी बचत तथा ऋण सहकारी संस्थाले सहकारी दिवसको अवसर पारेर उक्त सहयोग गरेको हो ।
सहकारीले गलेश्वरधाम जेष्ठ नागरिक आश्रमलाई नगद १५ हजार छ सय रुपियाँ प्रदान गरेको हो । सहकारीका सात सिद्धान्त मध्ये सामाजिक उत्तरदायित्व अन्तरगत उक्त आश्रमलाई सहयोग प्रदान गरेको संस्थाका अध्यक्ष रमेश गिरीले बताउनुभयो ।
यसैबीच ‘सहकारीको दिगोपन स्वनियम र सुशासन’ भन्ने मुल नाराका साथ मनाइएको सहकारी दिवसका अवसरमा कन्सन्ट्यान्ट डाक्टर अनिष भुषालले सुगर, प्रेसर तथा थाइराइड सम्बन्धी जानकारी गराउनु भएको थियो । सुगर, प्रेसर तथा थाइराइड रोग बिशेषज्ञ डा.भुषालले बेनी बचत तथा ऋण सहकारीका शेयर सदस्यहरुलाई रोग सम्बन्धी विविध जानकारी दिनुका साथै रोकथामका उपायहरुका बारेमा पनि जानकारी गराउनुभएको थियो । रोग कसरी लाग्छ, लागेको कसरी थाहा पाउने तथा निदानका लागि अहिले प्रयोगमा रहेका उपायहरु र त्यसबाट कसरी बच्ने भन्ने सम्बन्धमा उहाँले सहजीकरण गर्नुभएको थियो ।
संस्थाका अध्यक्ष रमेश गिरीको अध्यक्षता, उपाध्यक्ष सञ्जयकुमार श्रेष्ठको स्वागत, सचिव माधवप्रसाद रेग्मीको सञ्चालनमा भएको कार्यक्रममा संस्थापक अध्यक्ष हरिकुमार श्रेष्ठले मन्तव्य राख्नुभएको थियो ।
