रघुगंगा र मालिकामा एमालेको चुनावी सभा

नेकपा एमाले चुनाव प्रचारप्रसार मूल परिचालन कमिटी म्याग्दीको आयोजनामा अस्ति (शुक्रवार) रघुगंगा र मालिका गाउँपालिकामा चुनावी सभा सम्पन्न भएको छ । आसन्न मंसिर ४ गते हुने प्रतिनिधि सभा र प्रदेश सभा सदस्य निर्वाचनलाई लक्षित गरेर चुनावी कार्यक्रम आयोजना गरिएको एमालेले जनाएको छ ।
रघुगंगा–१, बेगखोला र २ राखुभगवतीमा आयोजित चुनावी सभालाई सम्बोधन गर्दै एमालेबाट प्रतिनिधिसभाका उम्मेदवार हरिकृष्ण श्रेष्ठले समृद्ध म्याग्दी बनाउनका लागि भूगोल र जनसङ्ख्यालाई ध्यान दिएर सोहीअनुसार नीति निर्माणमा आवश्यक पहल गर्ने बताए । उनले म्याग्दीमा खनिज पदार्थ र जडिबुटीको अपार भण्डार रहेको बताउँदै यसको उत्खनन् तथा बजारीकरणका लागि नीति बनाउन आवश्यक रहेकोमा जोड दिए ।
उम्मेदवार श्रेष्ठले भने, ‘हाम्रो म्याग्दी जिल्ला अपार सम्भावना नै सम्भावनाले भरिपूर्ण छ । यहाँ भएका स्रोतसाधनहरुको उचित परिचालन गरेर युवालाई रोजगारी दिन सकिन्छ । त्यसका लागि आवश्यक नीति बनाउन जरुरी छ ।’ जिल्लामा उपलब्ध स्रोतसाधनको परिचालन गर्नका लागि सो अनुसारको नीति आवश्यक भएकाले आफू चुनिएर गएपछि नीति बनाउन पहल गर्ने बताउँदै त्यसका लागि अहिले आफू निर्वाचनमा होमिएको हुँदा आफ्नो अमूल्य मत दिएर विजयी बनाउन मतदाताहरुलाई अनुरोध गरे ।
प्रदेशसभा (१)का एमाले उम्मेदवार देवेन्द्रबहादुर कटुवालले रघुगंगा गाउँपालिकामा रहेको जलविद्युत, कृषि, पर्यटन र वनपैदावरको विकासमा आफूले ध्यान दिने बताए । उनले राखु क्षेत्रमा रहेको खानेपानीको समस्या समाधानका लागि आवश्यक पहल गर्ने बताउँदै रुईसे क्षेत्रलाई पर्यटकीय गन्तव्य बनाउन पहल गर्ने बताए । पालिकाभित्र रहेको सम्भावनालाई उजागर गर्न प्रदेश तहबाट नीति निर्माण गरेर कार्यान्वयन गर्ने बताउँदै उनले त्यसका लागि आफू र एमाले पार्टीलाई सूर्य चिन्हमा मतदान गर्न आग्रह गरेका छन् ।
नेकपा एमाले स्थायी कमिटी सदस्य एवं पूर्वमन्त्री थममाया थापाले केपी ओली नेतृत्वको सरकारले देशको विकासमा महत्वपूर्ण तथा थुप्रै कामहरु गरेको बताइन् । उनले यसअघि एमालेको सरकारले चीनसँग पारवहन सन्धी–सम्झौता गरेर नेपाललाई समुन्द्रसँग जोड्ने, गुमेको भू–भाग समेटेर नयाँ चुच्चे नक्सा जारी गर्ने, देशलाई सुरुङमार्गमा प्रवेश गराउने, भारतबाट पाइपमा इन्धन ल्याउने, देशभित्रै रेल तथा पानीजहाज चलाउने जस्ता काम गरेको भन्दै थप कामका लागि एमालेलाई जिताउन आग्रह गरेकी छन् ।
एमाले केन्द्रीय सदस्य एवं म्याग्दी इन्चार्ज भूपेन्द्रबहादुर थापाले आफू सांसद रहँदा म्याग्दीको समस्यालाई संसदमा बुलन्द गर्नुका साथै म्याग्दीलाई हिमाली जिल्ला घोषणा गर्ने, जिल्लाभित्र सडकको स्तरोन्नति तथा विस्तार गर्ने, झोलुङ्गे पुल र पक्की मोटरबल पुल निर्माणको पहल गर्ने, पर्यटकीय क्षेत्रमा पदमार्गलगायत पूर्वाधारहरुको विकास गर्ने जस्ता थुप्रै कामहरु गरेको हुँदा अब बाँकी कामका लागि पनि एमालेलाई रोज्नुको विकल्प नभएको बताए ।
यसैगरी मालिका–४, ओखरबोटमा आयोजित चुनावी सभामा प्रदेशसभा (२)का उम्मेदवार यामबहादुुर गर्बुजाले ओखरबोटमा रहेको पर्यटकीयस्थल सोलेडाँडामा आवश्यक पूर्वाधारहरु निर्माण गरी पर्यटकीय गन्तव्य बनाउने र म्याग्दीको पश्चिमी क्षेत्रलाई छिमेकी बागलुङसँग जोड्ने बताए । उनले पश्चिम म्याग्दी क्षेत्रलाई अनुकुल हुने गरी आवश्यक नीति निर्माण गर्नुका साथै म्याग्दीको विकासमा पहल गर्ने बताउँदै त्यसका लागि काम गर्ने वातावरण मिलाउन जनतालाई अनुरोध गरेका छन् ।
कार्यक्रममा नेकपा एमाले गण्डकी प्रदेश कमिटी अध्यक्ष नवराज शर्मा, सदस्य सुवास विश्वकर्मा र एमाले म्याग्दीका सचिवालय सदस्य खरमाया बिटालुले ‘सुखी नेपाली र समृद्ध नेपाल’को सङ्कल्प पुरा गर्न नजिकै आएको मंसिर ४ गतेको निर्वाचनमा एमाले र एमालेका उम्मेदवारले जित्नुको विकल्प नभएको बताए । उनीहरुले आउँदो निर्वाचनमा एमालेको जित सुनिश्चित रहेको बताउँदै ढुक्क भएर एमालेलाई मतदान गर्न जनतालाई आग्रह गरेका थिए ।