गठबन्धन दलको मालिकामा चुनावी सभा

सत्तारुढ गठबन्धन दलले अस्ति (शुक्रवार) पश्चिम म्याग्दीको मालिका गाउँपालिकामा चुनावी सभा आयोजना गरेका छन् । प्रतिनिधि र प्रदेशसभा सदस्य निर्वाचनमा पाँचदलीय गठबन्धनका उमेद्वारले मालिका–१ निस्कोट, २ रुम र ३ डाँडागाउँमा चुनावी सभा गरेका हुन् ।
सभालाई सम्बोधन गर्दै उमेद्वार तथा गठबन्धनका नेताहरुले संविधानको रक्षा, राजनीतिक स्थिरता, विकास र समृद्धिका लागि परिवर्तनको नेतृत्व गरेका राजनीतिक शक्तिहरुबीच सहकार्य भएको बताए । आफ्नै बहुमत रहेको संसद दुई पटकसम्म विघटन गरेर जनमतको अपमान गर्ने, ओम्नी, ७० करोड जस्ता भ्रष्टाचारको काण्डमा मुछिएकालाई संरक्षण गर्ने, राष्ट्रिय मुद्दाहरुमा दोहोरो भूमिका खेल्ने ओलीबाट संविधान, देश र राष्ट्रियताको खतरा रहेकाले यसपालिको चुनावमा गठबन्धनका उमेद्वारलाई जिताउन उनीहरुले आग्रह गरेका थिए ।
यस्तै गठबन्धन दलका नेता तथा उमेद्वारले निस्कोट, रुम र डाडागाउँ जोड्ने सडकलाई स्तरोन्नति गर्ने, अधुरो विद्युतीकरण योजनालाई पूर्णता दिने, खानेपानी सुविधा विस्तार गर्ने, ढुङ्गाखानीलाई व्यवस्थित रुपमा सञ्चालन गर्न नीति बनाउने, शिक्षा, स्वास्थ्यमा सुधार, कृषि, पर्यटन र जडिवुटीको विकासमा जोड दिने प्रतिबद्धता जनाए ।
प्रतिनिधिसभा सदस्यका उमेद्वार तथा नेपाली कांग्रेस म्याग्दीका सभापति खमबहादुर गर्बुजा (खम्बीर)ले बेलायतको सेवा र सुविधा छाडेर दुईपटक चुनाव हार्दा पनि म्याग्देलीको हकहित र विकासका लागि राजनीतिमा निरन्तर समर्पित भएको बताए । उनले भने, ‘यहाँको समग्र विकासलाई तीव्रताका साथ अघि बढाउन पुलको काम गर्छु । नीति निर्माण तहमा म्याग्देली जनताको आवाज र भावनाको प्रतिनिधित्व गराउँछु । त्यसका लागि गठबन्धन दलका उमेद्वारलाई भोट दिएर जिताउनुपर्छ ।’
नेकपा माओवादी केन्द्रका जिल्ला संयोजक तथा प्रदेशसभा क्षेत्र (ख)का उमेद्वार रेशम जुग्जाली (सुविन)ले चुनावका लागि मात्र गाउँमा आएकाबाट विकास र जनताको समस्या समाधान नहुने भएकाले पाँचवर्ष खेर जान नदिनका लागि अपिल गरे । म २० वर्षदेखि यही भूगोलमा दुःखको सेवक र सुखको साथी बनेर राजनीति गर्दै आएको छु ।’ बाँकी जीवन पनि राजनीति क्षेत्रबाट जनताको सेवामा समर्पित गराउने उद्देश्यका साथ चुनावी मैदानमा आएको बताउँदै आफू र गठबन्धन दलको पक्षमा मतदान गरी विजयी बनाउन आग्रह गरे ।
नेकपा माओवादी केन्द्रबाट प्रतिनिधिसभा सदस्यमा समानुपातिक उमेद्वार बनेका राष्ट्रिय योजना आयोगका पूर्व उपाध्यक्ष डा. मिनबहादुर श्रेष्ठले देशैभर गठबन्धनप्रति जनलहर छाएकाले अब संघ र प्रदेशको सरकार पनि गठबन्धनकै बन्ने र जिल्लाका प्रतिनिधिहरु पनि गठबन्धन दलकै हुँदा विकासका योजना भिœयाउन र कार्यान्वयनमा सहज हुने बताए । माओवादी केन्द्रका केन्द्रीय सदस्य गोविन्द पौडेल र नेपाली कांग्रेसका महाधिवेशन प्रतिनिधि श्रीप्रसाद रोकाले गठबन्धन कसिलो बनेकाले जित सुनिश्चित भएको बताउँदै विपक्षीले फैलाएको भ्रममा नपर्न आग्रह गरे ।
एमालेबाट म्याग्दीमा जितेका नेताहरु मन्त्री हुँदा समेत आफ्नो जिल्लाको लागि अपेक्षाकृत काम नगर्न नसकेको आरोप लगाउँदै अब उनीहरुबाट म्याग्देलीले अपेक्षा गर्ने ठाउँ नरहेको बताए । नेपाली कांग्रेसका नेता पिपला बुढाथोकी, नेकपा एकीकृत समाजवादीका समानुपातिक उमेद्वार दुर्गा कार्कीले शान्ति प्रक्रिया, जनआन्दोलन, संविधान जारी र संघीयताको कार्यान्वयनमा सहकार्य गरेका राजनीतिक शक्तिहरु बीचको सहकार्यले राष्ट्रियताको रक्षा, संविधानको कार्यान्वयन र राजनीतिक स्थिरताका साथै सुशासन कायम हुने बताएका थिए ।