सिर्जना : बृद्ध भत्ता र बुढी आमा

चन्द्रवहादुर केसी
बृद्ध भत्ताबापत प्राप्त
दुई हजारका नोट लिइ
मनको सपिङ लिस्ट अनुसार
बजारमा सामान किनिसके पछि
घरतर्फ फर्कदै गरेकी
मेरी गाउँकि बुढी आमा
हातका औला भाच्दै
सामानको मूल्य र
तिरेको पैसाको
हिसाब मिलान गर्दैछिन।
खुशी हुँदै बजार गएकी बुढिआमै
दुई हजार खर्चिदा पनि
किनेका सामानको भारी नपुग्दा
खिन्न हुँदै मनको हिसाबशालामा
पुन फारो लगाउदै छिन् ।
सोच्दैछिन के नै पो किने र मैले
त्यही अलिकति मर्मसला
अलिकति चिनी र चियापत्ती
अलिकति नुन र तेल
अलिकति चामल र दाल
अनि अलिकति नातिनीलाइ मिठाइ ।
सकिएको थिएन मनको सपिङ लिस्ट
किन्नुथियो केहि बस्त्रहरु
केहि नरिबल र मिस्रीहरु
र केहि सामान्य औषधिहरु
तर सकियो साटेको दुई हजार ।
सोच्दैछिन् उस जमानामा
पैसा गर्हुङ्गो सामान हलुँगो थियो।
तर अहिले सामान गर्हुङ्गो
पैसा हलुँगो भएको छ।
भन्छन् राज्यले दुई हजार दिई
जेष्ठ नागरिकको सम्मान गरेको छ ।
तर यहाँ पैसा भन्दा पनि अघि दौडने
मुल्य वृद्धिको गतिले
जहिले निराश बनाएको छ
बुढी आमा जस्ता धेरै आमाहरुलाई
र बस्न बाध्य छन् अझै
वृद्ध भत्ता बृद्धिको आशामा।