बेनी अस्पतालको बहिरंग विभागबाट ४० हजारले लिए सेवा

हिमाली जिल्ला म्याग्दीको एक मात्रै सरकारी बेनी अस्पतालको बहिरंग विभागबाट मात्रै गत आर्थिक वर्षमा झण्डै ४० हजार जनताले सेवा लिएका छन् ।
आर्थिक बर्ष २०७८÷०७९ मा ३८ हजार ४ सय ३२ जनाले बहिरंग विभागबाट सेवा लिएको बेनी अस्पतालका निमित्त मेडीकल सुपरीटेण्डेन्ट डा.जितेन्द्र कँडेलले बताउनुभयो । गत आर्थिक वर्षको वार्षिक समिक्षा गोष्टीको आयोजना गरेर उक्त कुरा जानकारी गराउनुभएको हो । बेनी अस्पतालले सरोकारवालाहरुको उपस्थितमा वार्षिक प्रगतिको जानकारी गराउँदै डा.कँडेलले भौतिक पूर्वाधार निर्माण भएको खण्डमा उत्कृष्ट तबरले काम गर्न सकिने बताउनुभयो । डा.कँडेलले २०७२ सालदेखि निर्माण थालीएको बेनी अस्पतालको भवन निर्माण सम्पन्न नहुँदा बिरामीलाई सहज सुविधा दिन केही कठिन भएको बताउनुभयो । अहिले पनि ७० बेडबाट सुविधा दिई रहेको भएपनि भवन निर्माण भएको खण्डमा अझै सहज तबरले नागरिकलाई सुविधा दिन सकिने उहाँको भनाई थियो ।
२०३६ सालमा स्थापना भएको बेनी अस्पतालले २०७२ सालमा ५० शैयाको अस्पतालमा स्तरोन्नती भएको थियो ।
बेनी अस्पतालले गत आर्थिक बर्ष बेनी अस्पतालमा ७९९ जनालाई सुरक्षित तबरले सुत्केरी गराईएको छ । त्यस्तै २० वर्ष भन्दा कम उमेरका १६ सहित तीन सय ५४ जनाले सुरक्षित गर्भपतन सेवा लिएको बेनी अस्पतालले जनाएको छ । बेनी अस्पतालले गत आर्थिक वर्षमा ७६ जनाको पोष्टमार्टम गरेको थियो ।
५० शैयाको अनुमति प्राप्त बेनी अस्पतालमा ५९ जनाको दरबन्दी रहेता पनि दरवन्दीका १३ जना मात्रै कार्यरत रहेको डाक्टर कँडेलले बताउनुभयो । बेनी अस्पतालमा स्तनपान कक्ष, सामाजिक सेवा ईकाई, बच्चा वार्ड, अक्सिजन प्लान्ट लगायतको स्वास्थ्य सेवाहरु ब्यवस्थापन गरिएको समिक्षा गोष्टीमा डाक्टर कंडेलले बताउनुभयो ।
कार्यक्रमका प्रमुख अतिथि जिल्ला समन्वय समितिका प्रमुख राजकुमार थापाले कुनै पनि कार्य गर्ने समयमा हुने नीतिगत र कानुनी समस्याले गर्दा काम समयमै सम्पन्न गर्न कठिन भएको बताउनुभयो । जिसस प्रमुख थापाले अस्पतालको भवन छिटो सम्पन्न गराउनका लागि सबैले आ–आफ्नो स्थानबाट पहल गरिनु पर्ने बताउनुभयो । सरकारी सम्पत्तीको संरक्षण अहिले पछिल्लो समय निकै ठूलो चुनौती रहेको बताउँदै थापाले भन्नुभयो सामान्य बजेटको अभावमा करोडौं मुल्य पर्ने सरकारी सम्पत्ती खण्डहरमा परिणत भएको बताउनुभयो । जिल्लामा संघ र प्रदेशका ३९ कार्यालयहरुले स्थानीयतह तर्फ बढी अपेक्षा गर्ने मानसिकता रहेको तर्फ पनि थापाले सचेत गराउनुभएको थियो ।
कार्यक्रममा नेपाली कांग्रेसका प्रतिनिधि दुर्गाराम सुवेदी, नेकपा माओवादी केन्द्रका बेनी नगर कमिटीका अध्यक्ष शेरबहादुर केसी, स्वास्थ्य कार्यालय प्रमुख एकनारायण लम्साललगायतले मन्तव्य राख्दै जिल्लाका राजनीतिक दल र जनप्रतिनिधिहरु मिलेर अस्पतालको भवन छिटो सम्पन्न गराउने वातावरण तयार गर्नुपर्नेमा जोड दिनुभएको छ ।
बेनी अस्पताल व्यवस्थापन समितिका अध्यक्ष ज्ञानेन्द्रप्रसाद सुवेदीको अध्यक्षता, मेडीकल रेकर्डर प्रकाश सुवेदीको स्वागत तथा बेनी अस्पतालकी प्रवन्धक पुजा बानियाँको सञ्चालनमा भएको कार्यक्रममा पत्रकार महासंघ म्याग्दी शाखाका उपाध्यक्ष हरिकृष्ण गौतमले शुभकामना मन्तव्य राख्नुभएको थियो ।