मङ्सिर ४ गते हुने प्रतिनिधिसभा र प्रदेशसभाको निर्वाचनमा सत्ता गठबन्धनमा चुनावी तालमल हुने सहमति बनेपछि गठबन्धनभित्र सिट बाँडफाँटको गृहकार्य भएको छ । प्रतिनिधिसभाको प्रत्यक्षतर्फ १६५ निर्वाचन क्षेत्रमध्ये दलहरुमा सिट भागबण्डा गरेर आगामी निर्वाचनमा जाने गठबन्धनका दलहरु तयारी अवस्थामा छन् । प्रतिनिधिसभाको समानुपातिक निर्वाचत अन्तर्गत ११० सिटमा प्रतिस्पर्धा हुँदैछ ।
नेपाली कांग्रेसका सांसद एवम् सचेतक मीन विश्वकर्मा गएको १३ महिनामा राष्ट्रिय राजनीतिमा आएको समस्याका कारण वैकल्पिक सरकार बनाउने उद्देश्यसहित गठबन्धन बनाएको बताउनुहुन्छ । उहाँले आगामी निर्वाचनमा स्थानीय तहमा प्राप्त गरेको जनमतका आधारमा गठबन्धनले सङ्घीय र प्रदेशसभाको उम्मेदवार खडा गरिने बताउनुभयो ।
विश्वकर्माले भन्नुभयो, “पाँच दलले संयुक्तरुपमा नीति तथा कार्यक्रम घोषणा गरेको छ । स्थानीय निर्वाचनमा साझा उम्मेदवार र बजेट बनायौं । आगामी निर्वाचनमा पनि गठबन्धनसँगै जान्छौं ।”
कांग्रेस लोकतन्त्रमा विश्वास गर्ने भएकाले वाद, विवाद र सम्वादबाट सबै किसिमका प्रश्नको हल गरेर अघि बढ्ने उहाँको भनाइ छ । उहाँले गठबन्धनमा अरु दल पनि थपिनसक्ने सम्भावना रहेको पनि बताउनुभयाे ।
प्रतिपक्षमा रहँदै आएको लोकतान्त्रिक समाजवादी पार्टीले वर्तमान सरकारले नागरिकता विधेयक पारित गरेकोप्रति सकारात्मक रहेकाे जनाएकाे छ । लोसपाका नेता डा. सुरेन्द्र झाले सत्ता गठबन्धन र प्रमुख प्रतिपक्षी दल नेकपा (एमाले) दुवैसँग समदूरीको सम्बन्ध रहेको बताउनुभयो । जसका कारण सुविधाजनक सिट बाँडफाँट जता हुन्छ, लोसपा उसैसँग आगामी निर्वाचनमा जाने देखिन्छ ।
झाले भन्नुभएको छ, “गठबन्धन बनिहाल्ने ठोस स्थिति निर्माण भएको छैन । मधेसी, आदिवासी, महिला, दलितलगायतको मुद्दामा कुन पार्टी नजिक भएर आउनुहुन्छ ? तर, निर्णय भने भइसकेको छैन ।”
सत्ता गठबन्धनभित्र वाम मोर्चाको छुट्टै कसरत पनि हुँदै आएको छ । खासगरी, डा. बाबुराम भट्टराई र वामदेव गौतमले यो पटक निर्वाचन आयोगमा नयाँ दल दर्ता गराउनुभएको छ ।
वामदेव नेतृत्वको नेकपा एकता राष्ट्रिय अभियान पार्टीका प्रचार विभाग प्रमुख निमकान्त पाण्डेले कांग्रेस र एमालेलाई पनि चुनौती दिनेगरी वाम मोर्चा बन्ने बताउनुभयो । पाण्डेले भन्नुभयो, “तत्काल वाम गठबन्धन सम्भावना रहेन । नेकपा बिउँत्याउने प्रयास सफल रहेन । तर एमालेलाई गल्तीको महसुस भएको छ । वामदेवले ओलीसँग सबैभन्दा पहिले दुई घण्टा छलफल गर्नुभएकाे छ ।”
गठबन्धनमा डा. भट्टराईको नयाँ दल नेपाल समाजवादी पार्टी सम्मिलित हुने चर्चा छ । गठबन्धनभित्र वाम उपगठबन्धनको कसरतमा जोडघटाउ नमिले आफ्नै ढङ्गबाट अघि बढ्ने मुडमा डा. भट्टराईको पार्टी छ । उहाँका स्वकीय सचिव रोशन पोखरेलले पार्टीका कार्यकारिणीलाई निर्णय गर्ने अधिकार दिइएको बताउनुभयो ।
सम्मानजनक उपस्थिति सत्ता साझेदार दलहरु नेकपा (माओवादी केन्द्र), नेकपा (एकीकृत समाजवादी), जसपाले गठबन्धनमा सम्मानजनक उपस्थिति चाहेको बताउने गरेका छन् ।
समाजवादीका प्रचार विभाग प्रमुख जगन्नाथ खतिवडाले दलहरुले सुरुमा धेरै सिटको बार्गेनिङ गरे पनि अन्तिम बिन्दुमा यो साइजमा आउने बताउनुभयो । खतिवडाले भन्नुभयो, “हामीले यति नै सिट भनेका छैनौं । बटमलाइन एक्लै चुनेर पनि हुँदैन । छलफल अगाडि सारेका छौं, सम्मानजनक उपस्थिति चाहन्छौं ।”
यस्तै, नेकपा (माओवादी केन्द्र)का नेता देव गुरुङले पार्टीमा प्रस्ताव अघि सार्दै आएको राष्ट्रियताको मुद्दा, प्रजातन्त्र र सुशासन सम्बन्धमा समीक्षाको विषयमा छलफल हुन नसकेकाले वाम गठबन्धनमा खासै प्रगति नभएको भनाइ राख्दै भन्नुभयाे, “समीक्षाको दिशातर्फ अघि बढेन, नीतिगत विषयका कुरामा पनि समीक्षा गर्नुपर्छ भनिराखेका छौं ।” गोरखापत्र अनलाइनका लागि सपना थामीले तयार पारेको सामग्री
