बेनी नगरपालिकाले कृषकलाई दियो तरकारी लगाउने टनेल

हिमाली जिल्ला म्याग्दीको बेनी नगरपालिका–७ का कृषकलाई नगरपालिकाले तरकारी खेती गर्नका लागि टनेल वितरण गरेको छ ।
बेनी नगरपालिकाको वार्षिक कार्यक्रम अनुसार गरिवी निवारणका लागि लघु उद्यम विकास कार्यक्रम अन्तरगत २५ जना कृषकलाई सामग्री वितरण गरिएको हो । बेनी नगरपालिकाका रोजगार संयोजक कुलचन्द्र रेग्मीका अनुसार नगरपालिका तथा मेडपाको साझेदारीमा सञ्चालित गरिवी निवारणका लागि लघु उद्यम विकास कार्यक्रम अन्तरगत १५ जना कृषकलाई एक लाख ५० हजार मुल्य पर्ने ट्रष्ट पाइप र बेनी नगरपालिका वडा नम्बर ७ को उद्यम विकास कार्यक्रमबाट १० जना कृषकलाई प्लाष्टिक टनेल वितरण गरिएको हो ।
नगरपालिकाले १५ जना कृषकलाई जनही १०÷१० हजार रुपियाँ मूल्य पर्ने ट्रष्ट पाइप एवम् १० जना कृषकलाई जनही ७ हजार २ सय रुपियाँ मूल्य पर्ने प्लाष्टिक टनेल वितरण गरिएको हो ।
सामग्री वितरण कार्यक्रममा बेनी नगरपालिकाका प्रमुख सुरत केसी, उपप्रमुख ज्योति लामिछाने, प्रमुख प्रशासकिय अधिकृत धोलकराज ढकाल, बेनी नगरपालिका–७ का वडाध्यक्ष रमेशकुमार श्रेष्ठ, बेनी नगरपालिकाका रोजगार संयोजक कुलचन्द्र रेग्मी लगायतको उपस्थिति रहेको थियो ।