आगो निभाउने क्रममा जलेर एक जनाको मृत्यु, एकजना गम्भीर घाइते

हिमाली जिल्ला म्याग्दीको मालिका गाउँपालिका–५, देवीस्थानको जंगलमा लागेको आगो निभाउने क्रममा जलेर एक जनाको घटनास्थलमै मृत्यु हुनुका साथै एक जना गम्भीर घाइते हुनुभएको छ ।
देवीस्थानको भीरखर्क सामुदायिक वनमा लागेको आगोमा परी जलेर देवीस्थान गरजडाका २६ वर्षीय म बहादुर बोहोरा(सार्की)को मृत्यु भएको जिल्ला प्रहरी कार्यालय म्याग्दीले जनाएको छ । यसैगरी आगो निभाउने क्रममा मृतक बोहोराका भाइ २१ वर्षीय मनबहादुर सार्की गम्भीर घाइते भएको जिल्ला प्रहरी कार्यालय म्याग्दीका प्रहरी निरीक्षक (इन्स्पेक्टर) वीरेन्द्रराज गुरुङले जानकारी दिनुभयो ।
इन्स्पेक्टर गुरुङका अनुसार घाइते मनबहादुरलाई प्राथमिक स्वास्थ्य केन्द्र दरबाङमा उपचार पछि थप उपचारका लागि प्रभु एअरको हेलिकप्टरमार्फत पोखरा रिफर गरिएको छ । सामुदायिक वनमा कसले आगो लगायो भन्ने सन्दर्भमा अनुसन्धान भै रहेको भए पनि आगलागीको कारण खुल्न नसकेको प्रहरीले जनाएको छ ।