बिमलेन्द्रलाई उपसभापति बनाउने देउवा तयारी

काठमाडौँ, ५ मंसिर – कांग्रेस सभापति शेरबहादुर देउवा मंसिरभित्रै मनोनीत गर्न बाँकी पदाधिकारी तथा केन्द्रीय सदस्य मनोनीत गर्ने निष्कर्षमा पुगेका छन् । महाधिवेशन सम्पन्न भएको आठ महिना बितिसक्दा पनि केन्द्रीय समितिलाई पूर्णता दिन नसकी पार्टीभित्रै अक्षमको आलोचना खेपिरहेका सभापति देउवाले आन्तरिक तयारीसहित मंसिरभित्रै मनोनीत गर्न लागेका हुन् ।
देउवा २४ फागुन ०७२ मा सभापति निर्वाचित भएका थिए । धेरै आकांक्षी र विवादका कारण सभापति देउवाले उपसभापति, एक महामन्त्री, सहमहामन्त्री र प्रवक्तासमेत मनोनीत गर्न सकेका छैनन् ।
केन्द्रीय सदस्य महेन्द्र यादवले मनोनीत गर्दै केन्द्रीय कार्यसमिति र विभागलाई पूर्णता दिने विषयमा सभापति देउवा टुंगोमा पुगिसकेको बताए । कांग्रेस वरिष्ठ नेता रामचन्द्र पौडेल पक्षले भने मनोनयनको विषयमा आफूहरूसँग सभापति देउवाले अहिलेसम्म छलफल नै नगरेको बताएको छ । पौडेल पक्षधर नेता गुरुराज घिमिरेले मनोनयनको विषयमा छलफल नै नभएको जिकिर गरे । सहमतिबाटै मनोनीत गर्नुपर्छ भन्ने विषयमा नेता पौडेल सकारात्मक रहेको तर यस विषयमा छलफल नै नभएको उनको भनाइ छ ।
स्रोतका अनुसार देउवा आन्तरिक व्यवस्थापनसहित बिमलेन्द्र निधिलाई उपसभापति, अघिल्लो केन्द्रीय समितिमा सहमहामन्त्री रहिसकेका पूर्णबहादुर खड्कालाई महामन्त्री दिने मनस्थितिमा पुगेको बुझिएको छ । यस्तै, निर्वाचनबाट महामन्त्री र कोषाध्यक्ष हात पारेको रामचन्द्र  पौडेल पक्षलाई सहमहामन्त्री दिने सोचमा देउवा रहेका छन् ।
जसका लागि पौडेल पक्षबाट आनन्दप्रसाद ढुंगाना, दिलेन्द्रप्रसाद बडु र महेश आचार्य लागिरहेका छन् । तेस्रो धारको नेतृत्व गरिरहेका कृष्ण सिटौला पक्षलाई भने पदाधिकारी र केन्द्रीय सदस्य नदिने योजना सभापति देउवाको रहेको स्रोतको भनाइ छ । सिटौलालाई चित्त बुझाउन संसदीय दलमा समेट्ने गरी देउवाले गृहकार्य अघि बढाएको उनीनिकट नेताहरूले बताएका छन् । राजधानी