‘पाण्डवखानी कसको सहमतिमा टुक्राईयो ?’

बागलुङ, ३ मंसिर – राज्य पुनसंरचना आयोगको सिलिङ र तोकिएको मिति भन्दा फरक पर्नेगरी जिल्लाका राजनीतिक दलले गरेको निर्णय र प्राविधिक समितिले बुझाउन लागेको प्रतिवेदन विरुद्ध पाण्डवखानीबासीले खवरदारी गरेका छन् ।
उनीहरुले मिलेर बसेको पाण्डवखानी गाविसलाइ फुटालेर दुइ धु्रवमा बाँडेको भन्दै सदरमुकाममा आएर आक्रोस पोखेका छन् । ‘कसले अधिकार दियो हामीलाइ टुक्राउने’ पाण्डवखानीकी पूर्व गाविस उपाध्यक्ष तथा संघर्ष समितिकी अध्यक्ष राधिका पुनले भनिन्,‘गाविसबासीलाइ थाहै नदिइ जिल्लाका नेताहरुले हाम्रो भावना फुटाल्न पाइदैन ।’ राजनीतिक दलको बैठकले पाण्डवखानी गाविसको वडा नं. ३ र लाइ गलकोट नगरपालिका र बाँकी ७ वटा वडालाइ बडिगाढ गाउँपालिकामा मिलाउने निर्णय गरेका थिए । उक्त निर्णयमा रिघा गाविसको पनि दुइ वडालाइ गलकोट र बाँकीलाइ बडीगाढमा मिलाइएको छ ।
तोकिएको मापदण्ड विपरित गाभ्ने काम मात्र नभइ गाउँ पालिकामा ३७ हजार जनसंख्या पु¥याएकोमा पनि उनीहरुको आक्रोस छ । बुर्तिवाङ नगरपालिकामा २८ हजार जनसंख्या र गाउँपालिकामा यतिधेरै कसरी बनाउन मिल्छ ? उनीहरुले विहिवार पत्रकार सम्मेलन गरेर दलका नेतालाइ प्रश्न तेर्साए ।
काँग्रेसको तर्फबाट राधिका पुन, एमालेका टेकबहादुर पुन, नेकपा माओवादी केन्द्रका छमबहादुर काउचा, राष्ट्रिय जनमोर्चाका पृथबहादुर श्रीष र संघिय समाजवादी फोरमका दिप काउचाले हस्ताक्षर गरेर जिल्ला प्राविधिक समिति र सबै क्रियाशिल राजनीतिक दललाइ पनि उनीहरुले ध्यानाकर्षण पत्र बुझाएका छन् ।
बिना आधारमा गरिएको विभाजन मान्य नहुने र दलहरुले तत्काल नसच्याएमा कडा आन्दोलनमा उत्रने समेत उनीहरुले चेतावनी दिएका छन् । राजधानी सम्म पनि पुग्न सकिने उनीहरुको योजना छ । कार्यक्रममा पुनले शहिद बनेर भएपनि गाविसको अखण्डतालाइ जोगाउने बताइन् ।
कार्यक्रममा काँग्रेस जिल्ला सभापति दिपेन्द्रबहादुर थापाले आफ्नो पार्टीले इलाकालाइ आधार मानेर १३ वटा वा नभए ११ वटा पालिका बनाउने अडान राखेको बताए । आयोगले दिएको सिलिङपनि ११ भएपनि अन्य दलले १० वटामा सहमति गरेर एउटा अधिकार फिर्ता गर्दा पाण्डवखानी टुक्रिएको दावी गरे । उनले त्यो निर्णयमा आँफू सहमति नभएको दावी गरे ।
माओवादी केन्द्रका इन्चार्ज चन्द्रबहादुर बुढाले गलकोटमा बस्ने वा बडीगाढमा जानेमा स्थानीयले ठोस निर्णय नदिएकोले टुक्राएको दावी गरे । उनको त्यो भनाइको प्रतिकार गर्दै पुनले भने गाउँका सोझा साझा जनताले धेरै कुरा गर्न नजान्ने भन्दै जता गएपनि सिंगो गाविस हुनुपर्ने बताइन् । सोझालाइ झुक्याएर मिलेर बसेको बस्ती फुटाइएको उनले आरोप पनि लगाइन् । कार्यक्रममा संघर्ष समितिको रुपमा आएका स्थानीयहरु समबहादुर काउचा, तिलक घर्ती, रामप्रसाद विक, रिघाकी रेनुका काउचा लगायतले बोलेका थिए । संघर्ष समितिको चर्काचर्कीपछि जिल्लाका क्रियाशिल दलका प्रमुखले पुर्नविचार गर्न सकिने आश्वासन दिएको बताइएको छ । लामो समय सम्मको विवादले पुन संरचनाको काम रोकिएको छ । यस अघि दिएको मापदण्डमा रहेर ८ वटा पालिका बनाउने क्रममा भने गाविसलाइ टुक्राइएको थिएन । यसपटक भने जिल्लाको सिगाना, पाला, पाण्डवखानी, रिघा र राङखानीलाइ समेत टुक्राइएको छ ।
राजकुतमा विरोध जुलुश र कोणसभा
गाउँपालिका र नगरपालिका सिमाङ्कनको विरोधमा असन्तुष्ट पक्षले बिहिबार राजकुतमा विरोध जुलुस र कोण सभा गरेको छ ।
गाविसको वडा नम्बर–१ देखि ६ सम्म विरोध जुलुस सहित वडा नम्बर–२ को कुतनेटा बजारमा कोणसभा गरि राजकुतलाई ढोरपाटन नगरमा नभई निसीखोला गाउँपालिकामा राख्न माग गरिएको नेपाली काँग्रेसका जिल्ला सदस्य प्रकाश कुवँरले बताएका छन् ।
विरोधकर्ताले नगरपालिका चाँहिदैन, अधिकार खोस्न पाईदैन, नाममात्रको शहर जाने छैन रहर, विकास गर्ने मन भए गाउँपालिका काफि छ लगायतका नारा नारा लगाएका थिए ।
निसीखोला गाउँ पालिकामा बुर्तिबाङ बस्नेले जर्बजस्ती ढोरपाटन नगरपालिकामा समावेश गरेकाले राजकुतबासी अन्यायमा परेको विरोधकर्ताको दाबी छ ।
कोणसभामा राजकुत गाविसका निर्वतमान गाविस अध्यक्ष गणेशबहादुर कुवँरले आफुहरुको माग विपरित नगरपालिकामा राखेकाले त्यसलाई सच्याउन आन्दोलन गर्नुपरेको बताए । कार्यक्रममा काँग्रेसका जिल्ला सदस्य प्रकाश कुवँर, पार्टी सचिव रामबहादुर कुँवर, नेकपा माओवादी केन्द्र राजकुतका कृष्ण पुन, र काँग्रेसका पुर्वसभापति खिमबहादुर मल्लले मन्तव्य राखे । कार्यक्रममा नेकपा एमालेका राजकुत गाउँ पार्टि उपाध्यक्ष दुर्गाबहादुर तामाङ सहभागी थिए । कोणसभा संघर्ष समितिका संयोजक डेमलाल श्रेष्ठको अध्यक्षता र रुपेश श्रेष्ठको सञ्चालनमा भएको थियो ।
असन्तुष्ट पक्षले हटाएको भन्दै आएका काँग्रेस सभापती तेजिन्द्र विक्रम कुँवर, एमालेका अध्यक्ष लालविर लोप्चन लगायतका नेताले भने यसअघि देखिनै ढोरपाटन नगरपालिका नै उपयुक्त रहेको भन्दै आएकोमा आयोगमा पठार्ईको नगरमै राख्ने प्रश्तावलाई बचाउ गर्ने गरेका छन् । गाउँपालिका कि नगरपालिका भन्ने विवाद् चुलिएपछि राजकुत काँग्रेसका नेता विपक्षीसँग आरोप प्रत्यारोपमै उत्रिएका छन् । गाविसभित्र गरिएको पहिलो चरणको आन्दोलन सकिएको र अब थप छलफल गरेर नयाँ संघर्षका कार्यक्रम तय गर्ने काँग्रेसका जिल्ला सदस्य प्रकाश कुँवरले जानकारी दिए ।