प्रधानमन्त्री केपी ओलीले राजनीतिक परिवर्तनलाई सामाजिक जीवनका समग्र आयामसँग जोडेर समुन्नत प्रणाली विकास गर्न सके मात्रै गणतन्त्र दिगो बन्न सक्ने बताएका छन् ।
गणतन्त्र दिवसका अवसरमा बिहीबार शुभकामना सन्देश जारी गर्दै ओलीले जनता साँचो अर्थमा सार्वभौम बनेको यो दिन नेपालको राजनीतिक इतिहासको महत्वपूर्ण र अविस्मरणीय दिन भएको स्मरण गरेका छन् । ‘गणतन्त्र दिवस जनताले सफलता प्राप्त गरेको र जनता विजयी भएको महान उत्सव हो’, ओलीले भनेका छन्, ‘ यस उत्सवमा म यहाँहरु सबैलाई पुनः हार्दिक वधाइ ज्ञापन गर्दछु ।’
सामन्तवादको थालनीसँगै जन्मसिद्ध श्रेष्ठताका आधारमा शासकहरु स्थापित हुने, उनीहरुको वंश परम्पराका आधारमा शासन व्यवस्था सञ्चालन हुने र उनीहरुको हुकुम नै कानुन हुने चरम अलोकतान्त्रिक प्रणालीलाई गणतन्त्रमार्फत बिदाई गरिएको भन्दै प्रधानमन्त्रीले त्यसको सुखसद स्मरण गरेका छन् ।
‘झण्डै दुई हजार वर्षसम्म चलेको यस्तो सामन्ती प्रणालीलाई अन्त्य गरेर हामीले इतिहासको एउटा महत्वपूर्ण कडीलाई जोडेका छौँ । र, विकास गरेका छौं’, प्रधानमन्त्रीको सन्देशमा भनिएको छ, ‘नेपालमा कुनै पनि स्वरुपको अनिर्वाचित सत्ता अन्त्य भएको छ । आज जनताले निर्वाचित गरेका प्रतिनिधिहरुद्वारा प्रतिपादन गरिएको गणतन्त्र स्थापनासँगै हामीले हासिल गरेका यी उपलव्धिहरु गौरवपूर्ण र दूरगामी महत्वका छन् ।’
लोकतान्त्रिक गणतन्त्रलाई सबल तुल्याउन सरकारले सामाजिक न्याय, सुशासन र समृद्धिका तीनवटै आयामलाई समुचित सन्तुलनका साथ अगाडि बढाइरहेको प्रधानमन्त्रीको भनाइ छ । राजतन्त्र अन्त्य र गणतन्त्र स्थापनासँगै आर्थिक क्षेत्रमा पनि नेपालले उल्लेखनीय उपलब्धि हासिल गरेको भन्दै ओलीले यसअघि लगातार औसत ७ प्रतिशतभन्दा बढीको आर्थिक वृद्धिदर हासिल हुनु, निरपेक्ष गरिबीमा निरन्तर कमी आउनु र सुशासन, शान्ति, व्यवसायिक वातावरणजस्ता महत्वपूर्ण विश्व सूचकहरुमा उल्लेख्य सुधार आउनुले सरकार सही दिशातिर अगाडि बढिरहेको स्पष्ट हुने दाबी गरेका छन् ।
‘गणतन्त्र गणहरुमार्फत अर्थात् जनताहरूमार्फत जनताको तन्त्र हो । जनतालाई केन्द्रबिन्दुमा राखेर, जनताको इच्छामा र जनताका लागि सञ्चालित हुने शासन व्यवस्था हो । गणतन्त्र शासन प्रणाली मात्रै होइन । यो त नयाँ सभ्यता, संस्कृति र सामाजिक जीवन पद्धति पनि हो’, प्रधानमन्त्री ओलीले सन्देशमा भनेका छन् ।
जनताको सेवा र विकास निर्माणका लागि सङ्घीय संरचनाका तीनै तहबीच समन्वय कायम गर्र्दै अगाडि बढ्ने काम भएको पनि प्रधानमन्त्रीले बताएका छन् ।
गणतन्त्र स्थापनाको छोटो समयमै अलोकतान्त्रिक शासन प्रणालीहरुका कारण क्षति हुन गएको, सुस्ताएको हाम्रो विकास यात्रा, ओझेलमा परेका समृद्धिका आकाङ्क्षाहरु र कमजोर बन्न पुगेको राष्ट्रिय स्वाभिमानलाई पुनस्र्थापित गर्न र नयाँ ऊर्जा भर्न सक्ने र लोकतान्त्रिक गणतन्त्रको माध्यमबाट विश्व मानचित्रमा नेपाललाई एउटा विकसित राष्ट्रको नयाँ पहिचान दिन सक्ने विश्वास व्यक्त गरे ।
जुनसुकै शासन प्रणालीलाई पनि संस्थागत हुन, सुदृढ बन्न र त्यसले परिणाम दिन निश्चित समय लाग्ने भन्दै उनले प्रणाली विकासका क्रममा साना तिना कमीहरु देखा पर्न पनि सक्ने तर्क गरेका छन् । ‘तर कुनै पनि कोणबाट गणतन्त्रमाथि प्रश्न उठाउने र पुरानो व्यवस्थातिर फर्कन खोज्ने प्रतिगामी चेष्टाहरु अवश्य नै अनुचित हुन् । इतिहासको गतिलाई पछाडि फर्काउन अब कसैले पनि सक्दैन’, ओलीले भनेका छन् ।
उनले संविधानद्वारा मुलुकको शासन व्यवस्था सञ्चालित रहेको र संविधानमा जनताका अधिकार एवं सर्वोत्तम हित र आकाङ्क्षाहरु प्रतिविम्बित भएका उल्लेख गर्दै सरकारका सम्पूर्ण साधनस्रोतहरू र प्रयासहरु ती आकाङ्क्षालाई मूर्त रुप दिन केन्द्रित रहेको बताएका छन् ।
सिङ्गो मानव समुदाय कोरोना महामारी विरुद्धको कठिन सङ्घर्षमा जुटेको र हाम्रो पुस्ताले भोग्नु परेको सर्वाधिक ठूलो यस चुनौतीले हाम्रा प्राथमिकताहरु मात्रै होइन, हाम्रो कार्यपद्धति र जीवनशैलीलाई नै प्रभावित गरेको प्रधानमन्त्रीको भनाइ छ ।
नेपालीहरु पनि कोरोना महामारीका विरुद्धको कठिन सङ्घर्षमा केन्द्रित रहेको भन्दै उनले संक्रमित नभएकालाई सुरक्षित रहन र सङ्क्रमित भएकाहरु छिट्टै निको भएर सामान्य जीवनमा फर्कन सकुन भन्ने शुभकामना व्यक्त गरेका छन् ।
उनले यस चुनौतिलाई परास्त गरिछाड्ने अठोट उनले व्यीक्त गरेका छन् । प्रधानमन्त्रीले यस्तो बेलामा सिंगो देश, र देशबासी एकजुट भएर कोरोनाविरुद्ध लड्न तथा गणतन्त्रलाई वास्तविक अर्थमा संस्थागत गर्न एकताबद्ध प्रयासहरूलाई अगाडि बढाउन जरुरी रहेको बताएका छन् ।
प्रधानमन्त्रीले जन्मसिद्ध श्रेष्ठताको सामन्तवादी प्रणालीमाथि आधारित र जबर्जस्ती थोपरिएको राजतन्त्रको अन्त्य गरेर गणतन्त्र स्थापनाको सपना देख्ने र तिनै सपनाद्वारा आन्दोलनमा मार्गदर्शन गर्ने अग्रजहरुप्रति हार्दिक सम्मान व्यक्त गरेका छन् ।
यस्तै आफ्नो जिन्दगी उत्सर्ग गरेर गणतन्त्रको उज्यालो प्रदान गर्ने प्रातःस्मरणीय सहिदहरुप्रति भावपूर्ण श्रद्धाञ्जली अर्पण गरेका छन् ।
