जमुनाको परिवारलाई स्टेशनरी तथा खाजा सहयोग

आफ्नो बुबाआमा दुवैले दोस्रो विवाह गरेर गएपछि हजुरआमासँग चर्पीका लागि बनाइएको छाप्रोमा बस्दै आएका एक परिवारलाई सहयोग प्राप्त भएको छ । बगरफाँटस्थित विद्यालयमा बस्ने दुई भाइ र तिनीहरुका हजुरआमा ७५ वर्षीया जमुना परियारलाई शनिबार बेनी नगरपालिका–२, भकुण्डेका भीमबहादुर पौडेलले खाद्यान्न, स्टेशनरी र खाजा सहयोग गरेका हुन् ।
छोरा बुहारीले छोडेर गएपछि बालुवा चालेर र अरुको ज्याला मजदुरी गरेर नातिहरुलाई पाल्दै आएकी ७५ वर्षीया परियार नातिहरुसहित बेनी नगरपालिका–२, बगरफाँटको सरस्वती आधारभूत विद्यालयको शौचालयमा बस्दै आएको समाचार विभिन्न सञ्चारमाध्यमबाट थाहा पाएपछि पौडेलले ४ हजार रुपैयाँ बराबरको खाद्यान्न र स्टेशनरी तथा खाजाका लागि बिस्कुट सहयोग गरेका छन् ।
शनिबार भकुण्डेबाट विद्यालयमा नै आएर पौडलले एक बोरा चामल, आलु, दाल, नुन, कापी, कलम र बिस्कुट लगायतका दैनिक उपभोग्य सामग्रीहरु सहयोग गरेको बताए । उक्त सामग्रीहरु उनले विद्यालय व्यवस्थापन समितिका अध्यक्ष नारायण कार्की, स्थानीय बुद्धिजीविहरु कृष्णबहादुर कार्की, भीमबहादुर रिजाल, खगराज निउरे, विष्णुप्रसाद शर्मा, खिमबहादुर कार्की, कृष्णप्रसाद रिजाल, गणेश घिमिरे लगायतको रोहवरमा परियारलाई प्रदान गरेका हुन् ।
बुबा र आमा दुवैले दोस्रो विवाह गरेर बेपत्ता भएपछि अलपत्र बनेका ९ वर्षीय एनोस र ७ वर्षीय सिमसन २ वर्षदेखि हजुरआमा जमुनासँगै बस्दै आएका छन् । तीन महिना (मंसिर) अघिसम्म बेनीबजारमा कोठा भाडामा लिएर बालुवा चाल्ने, अरुको ज्याला मजदुरी आदि काम गरेर नातिहरुलाई पाल्दै आएकी जमुना कोठाभाडा तिर्ने पैसा नभएपछि गत मंसिरदेखि सरस्वती आधारभूत विद्यालयको चर्पीका लागि बनाइएको छाप्रोमा बस्दै आएकी छिन् ।