म्याग्दी जिल्लाको दुर्गम तथा विकट गाउँहरुमा सञ्चालन हुँदै आइरहेको एकीकृत घुम्ती शिविरले स्थानीयलाई राहत मिलेको छ । जिल्ला प्रशासन कार्यालय म्याग्दीको आयोजना र जिल्लास्थित स्थानीय तहहरुको व्यवस्थापनमा गाउँगाउँमा सञ्चालित शिविरले स्थानीयवासिन्दालाई राहत मिल्नुका समयको बचत भएको हो ।
यसैक्रममा शनिबार पश्चिम म्याग्दीको धवलागिरी गाउँपालिका–६, मराङको कुम्रीस्थित वडा कार्यालय परिसरमा एकीकृत घुम्ती शिविर सम्पन्न भएको छ । भौगोलिक रुपमा विकट र दुर्गम क्षेत्रका सर्वसाधारणलाई गाउँमै सार्वजनिक सेवा उपलब्ध गराउने उद्देश्यले जिल्ला प्रशासन कार्यालय म्याग्दी र धवलागिरी गाउँपालिकाले वडा कार्यालयसँगको समन्वयमा शिविरको आयोजना गरेको थियो ।
शिविरमा जिल्ला प्रशासन कार्यालयको टोलीले सर्वसाधारणलाई ७० वटा नयाँ र १३ वटा प्रतिलिपि नागरिकताको प्रमाणपत्र वितरण गरिएको गाउँपालिकाका उपाध्यक्ष रेशम छन्त्यालले बताए । उक्त शिविरमा बेनी अस्पताल म्याग्दीका चिकित्सक र गाउँपालिकाको स्वास्थ्य शाखाका स्वास्थ्यकर्मीहरुले ७७ जनाको स्वास्थ्य परीक्षण गर्नुका साथै परामर्श सेवा उपलब्ध र निःशुल्क औषधी वितरण गरेका थिए । यसैगरी शिविरको अवसरमा जिल्ला निर्वाचन कार्यालयको टोलीले सञ्चालन गरेको तस्विरसहितको मतदाता नामावली सङ्कलनमा ५७ जनाले नामदर्ता गराएका छन् ।
सोही शिविरमा गाउँपालिकाले अपाङ्गता र ज्येष्ठनागरिक परिचयपत्र वितरण सुरु गरेको गाउँपालिकाका प्रमुख प्रशासकीय अधिकृत अर्जुन शर्माले जानकारी दिए । शिविरमा ५१ जना ज्येष्ठनागरिक र ४ जनालाई अपाङ्गता परिचयपत्र उपलब्ध गराइएको उनले बताए ।
मराङकी ७६ वर्षीया नरिमा पुनलाई धौलागिरी गाउँपालिकाका अध्यक्ष थमसरा पुन, म्याग्दीका प्रमुख जिल्ला अधिकारी लीलाधर अधिकारी, प्रहरी नायव उपरीक्षक विरबहादुर बुढामगर, गाउँपालिकाका उपाध्यक्ष रेशम छन्त्याल, प्रमुख प्रशासकीय अधिकृत शर्मा र वडा अध्यक्ष राजाराम शर्माले ज्येष्ठनागरिक परिचयपत्र उपलब्ध गराएका थिए । एकीकृत घुम्ती शिविरमा मराङ र मल्कबाङका बासिन्दाहरुले पाएका थिए । गाउँपालिकाले सञ्चालन गरेको योजना सम्झौता, अपाङ्गता र ज्येष्ठनागरिक परिचयपत्र वितरणसम्बन्धी शिविर भने आइतबारसम्म जारी रहने गाउँपालिकाले जनाएको छ ।
मराङ र मल्कबाङमा गाउँपालिकाले बजेट विनियोजन गरेका योजनाको वडामै सम्झौता गर्न घुम्ती शिविर सञ्चालन गरिएको गाउँपालिका अध्यक्ष पुनको भनाइ छ । सदरमुकाममा रहेका कार्यालयमा पुगेर सेवा लिन नसकेका सर्वसाधारणलाई लक्षित गरेर एकीकृत घुम्ती शिविर सञ्चालन गरिएको प्रजिअ अधिकारीले बताएका छन् । यसअघि धवलागिरी गाउँपालिकाको गूर्जा, लुलाङ, रघुगंगाको रायखोर, मंगलाको बराङ्जा र कुहुँ तथा मालिकाको देविस्थानमा एकीकृत घुम्ती शिविर सञ्चालन गरिसकिएको छ । अन्नपूर्ण गाउँपालिकाको शिखमा पनि शिविर सञ्चालन गरिने जिल्ला प्रशासन कार्यालयले बताएका छ ।
जिल्ला प्रशासन कार्यालयको आयोजना र स्थानीय तहको समन्वय तथा व्यवस्थापनमा जिल्लाका विभिन्न स्थानमा सञ्चालन गरिएका शिविरमा स्थानीयवासीले सदरमुकाममा पाउने सरकारी सेवासुविधा गाउँमै पाएपछि उनीहरु दङ्ग परेका छन् । गाउँमै सञ्चालन गरिने एकीकृत घुम्ती शिविरले सदरमुकामसम्म पुग्नुपर्ने झन्झट कम हुनुका साथै स्थानीयलाई समयको समेत बचत भएको छ ।
