नारायणगढ, १० कात्तिक – घरेलु टिम चितवन-११ लाई ४-० गोलको फराकिलो अन्तरले हराउँदै सोमबार ‘ए’ डिभिजन क्लब मनाङ मस्र्याङ्दी चितवनको नारायणगढस्थित क्याम्पाचौरमा जारी विकास रनिङ सिल्ड फुटबल प्रतियोगिताको सेमिफाइनल प्रवेश गरेको छ ।
मनाङ प्रतियोगिताको पहिलो चरणमा भारतीय टिम युनाइटेड क्लब सिवानलाई ४-१ गोलले हराउँदै क्वार्टरफाइनल प्रवेश गरेको थियो । पहिलो चरणमा कैलालीलाई टाइब्रेकरमा हराएर क्वार्टरफाइनल खेलेको चितवन मनाङसँग हारेपछि उपाधि होडबाट बाहिरिएको छ ।
मनाङको जितमा ओलावाले अफिजले दुई गोलको योगदान गरे । विमल राना र विश्वास श्रेष्ठले पनि एकएक गोल गरे । खेल सुरु भएको दुस्रो मिनेटमै चितवनको रक्षापंक्ति कमजोर भएको मौका छोपी मनाङका ओलावालेले पहिलो गोल गर्दै टिमलाई अग्रता दिलाए ।
३२औं मिनेटमा मनाङका विमल रानाले चितवनका गोलरक्षक मनोज गुरुङको खुट्टा मुनिबाट बललाई जाली चुमाएर टिमको अग्रता दोब्बर पारे ।
यसैगरी पहिलो हाफको अतिरिक्त समयको दोस्रो मिनेटमा मनाङका विश्वास श्रेष्ठले गोल थप्दै घरेलु दर्शकलाई निराश बनाए । घरेलु टिम चितवनको हौसला बढाउन क्याम्पाचौरमा दर्शकको बाक्लो उपस्थिति थियो । खेलमा पहिलो गोल गरेका मनाङका ओलावालेले ६०औं मिनेटमा अन्तिम गोल गर्दै नतिजालाई ४-० ले आफ्नो टोलीको पक्षमा पारेका थिए ।
जित सुनिश्चित देखेपछि मनाङका प्रशिक्षक हेमन्त आलेले खेलको ६५औँ मिनेटमा गोलरक्षक परिवर्तन गर्दै दीप कार्कीलाई मैदानमा पठाएका थिए । ७०औं मिनेटमा चितवनका खेलाडी बाबुले गरेको गोल प्रयास सफल हुन सकेन ।
मनाङका तर्फबाट खेलको ७१औं मिनेटमा विमल र ८१औं मिनेटमा साम्सनले प्रहार गरेको बल गोलपोस्टभित्र छिरे पनि अफसाइड गोल ठहरियो ।
खेलको ७२औं मिनेटमा मनाङका विमलले पास दिएको बल विश्वासले गोल पोस्टमा प्रहार गरे पनि चितवनका गोलरक्षक मनोजले त्यसलाई असफल बनाए । प्लेयर अफ दी म्याच घोषित हुँदै विश्वासले १० हजार रुपैयाँ पुरस्कार पाए । मंगलबार हुने तेस्रो क्वार्टरफाइनल खेलमा हिमालयन शेर्पा क्लब र त्रिभुवन आर्मी क्लबबीच भिडन्त हुनेछ ।
हिमालयन आफ्नो पहिलो खेलमा ब्वाइज युनियनलाई हराउँदै क्वार्टरफाइनल पुगेको हो । विभागीय टिम आर्मी भने प्रतियोगिताको एकमात्र बाई पाएर सीधै क्वार्टरफाइनल खेल्ने टो हो । विकास सिल्ड समिति नारायणगढले आयोजना गरेको प्रतियोगिताको मुख्य प्रायोजक टुबोर्ग बियर रहेको छ ।
कात्तिक १ बाट सुरु भएको प्रतियोगिता कात्तिक १४ सम्म चल्नेछ । प्रतियोगिताको विजेताले तीन लाख र उपविजेताले एक लाख ५० हजार रुपैयाँ पुरस्कार पाउनेछन् ।
