बागलुङमा बालगृह संचालनमा हुने

बागलुङ, ६ कात्तिक – जिल्लामा सडक बालबालिकाहरुको सहयोगका लागि बालगृह संचालनमा आउने भएको छ । गरिबी र अशिक्षाका कारण हरेक अधिकारबाट बञ्चित भएका सडक बालबालिकाको सहयोगका लागि बालगृह संचालन गर्ने निर्णय भएको हो ।
बागलुङ जिल्लामा रहेका सरोकारवालाहरुको बैठकले बानपा–२ स्थित स्थानिय शान्ति समितिको कार्यालय रहेको भवनमा बालगृह संचालन गर्ने निर्णय गरेको बताईएको छ ।
हाल शान्ति समितिको कार्यालय रहेको भवन बालगृहका लागि निर्माण भएकोले सोही भवनमा बालबालिकालाई राख्ने गरि संचालन गरिने निर्णय भएको जनाइएको छ । बालगृह संचालन नहुँदा बिभिन्न कारणले समस्यामा परेका बालबालिकाको अधिकार स्थापित हुन नसकेकाले संचालन गर्ने निर्णय भएको प्रमुख जिल्ला अधिकारी भागीरथ पाण्डेयले बताए ।
जिल्लामा बालगृह संचालन नहुँदा अन्य जिल्लाका संघ संस्थालाई गुहार्नु पर्ने बाध्यता आएको उल्लेख गर्दै प्रजिअ पाण्डेयले बिभिन्न क्षेत्रबाट स्रोत जुटाएर संचालन गर्ने तयारी भएको बताए । उनले बालगृह संचालनका लागि सबैको सहयोग आवश्यक रहेको बताए ।
शुरुवातमा जिवनस्तर सुधारका लागि नयाँ जिवन पुर्नस्थापना केन्द्रमा राखिएका ४ जना सडक बालबालिकालाई बालगृहमा राखिने सेभ द यूथ नेपालका अध्यक्ष मनिष रायमाझीले बताए ।