विद्यालय पुर्ननिमाणको लागि महायज्ञ शुरु

बागलुङ, ४ कात्तिक – भूकम्पबाट क्षति पुगेको धवलागिरी अञ्चलकै जेठो सामुदायिक बिद्यालय बिद्या मन्दिर उच्च माविको भवन पुनःनिर्माणको लागि आयोजना गरिएको कालीगण्डकी बागलुङ कालिका धार्मिक तथा शैक्षिक महोत्सव बुधबारबाट शुरु भएको छ ।
महोत्सवसंगै आयोजित विद्यामन्दिर धन–धान्याचल श्रीमद्भागवत सप्ताह ज्ञान महायज्ञको पहिलो दिन बुधबार ४ करोड रुपैयाँ संकलन भएको छ । महायज्ञमा बिद्यालयको एक कोठा निर्माणको लागि आवश्यक पर्ने १२ लाख ५० हजार रुपैयाँ २४ जना व्यक्तिले पहिलो दिन नै प्रदान गरेका छन् ।
कार्तिक १० गतेसम्म संचालन हुने महायज्ञलाई धान्याञ्चल मुल आयोजक समितिका अध्यक्ष एवं समाजसेवी लालचन्द्र राजभण्डारी, विद्यालयका संस्थापक ओमप्रसाद गौचनका छोरा पुर्व वनराज्यमन्त्री ओमकारप्रसाद गौचन, ग्लोबल बैकका संचालक चन्द्र ढकाल, प्रभु बैंक सिईओ अशोक शेरचन, उद्यमी पुस्पमान श्रेष्ठ, सह अध्यक्ष सुवास राजभण्डारी, लक्ष्मीराज राजभण्डारी, दिपकचन्द्र प्रधान, शैलेन्द्रप्रसाद श्रेष्ठ लगायतका २४ जना शिक्षाप्रेमीले उक्त रकम प्रदान गरेको विद्यालयका प्राचार्य जगन्नाथ आचार्यले जानकारी दिए ।
२५ कोठे सुविधा सम्पन्न भवन निमार्णको लागि संचालन गरिएको महायज्ञमा १० करोड रुपैयाँ उठाउने लक्ष्य राखिएको आचार्यले बताए । भवन निर्माणको लागि अहिलेसम्म २४ वटा कोठा निर्माणको लागि समाजसेवी, उद्यमी, व्यापारी, शिक्षा प्रेमीबाट प्रतिव्यक्ति १२ लाख ५० हजार रुपैयाँ सहयोग गरेको धनधान्याञ्च सप्ताह ज्ञानमहाज्ञका अध्यक्ष लालचन्द्र राजभण्डारीले बताए ।
महायज्ञको पहिलो दिन हजारौ व्यक्तिद्धारा कालिगण्डकी नदीबाट जल ल्याएर बाजागाजा र भजनकिर्तनसहित नगरमा कलश यात्रा गरिएको थियो । महायज्ञमा कथावाचन पण्डित गोविन्द शरण महाराज र पूज्या मीरा दिदीले गर्नेछन् ।
१९९७ सालमा स्वर्गिय ओमप्रसाद गौचन र मेघकुमार बैद्यले स्थापना गरेको बिद्यालयबाट अहिलेसम्म ५ हजार बिद्यार्थीले एसएलसी परिक्षा पास गरिसकेका छन् । कक्षा १ देखि १२ सम्म अध्ययन हुने यस बिद्यालयमा अहिले ५ सय जना बिद्यार्थीले अध्ययन गर्छन् ।
महायज्ञ मुल आयोजक समितिका अध्यक्ष लालचन्द्र राजभण्डारीको अध्यक्षतामा सम्पन्न उद्घाटन समारोहमा स्वागत सहअध्यक्ष सुभास राजभण्डारी र संचालन प्रअ जगन्नाथ आचार्य र उमावि संयोजक डिल्लीराज गौतमले गरेका थिए ।
कार्यक्रममा प्रमुख अतिथि पूर्व राज्यमन्त्री ओमकार प्रसाद गौचन, सांसद चम्पादेवि खड्का, प्रमुख बाचक स्वामी गोविन्द महाराज, सहवाचक मिरा दिदी, प्रमुख जिल्ला अधिकारी भागिरथ पाण्डे, देव बहादुर श्रेष्ठ, विश्वनाथ रेग्मी, पूर्व विद्यार्थी सोविन्द्र कुमार श्रेष्ठ, दाता मध्यबाट तिर्थप्रसाद श्रेष्ठ, सुमन शाक्य, पुष्पमान श्रेष्ठ र ब्रम्हकुमारी ईश्वरीय विश्वविद्यालयकी संचालिका सावित्री दिदी लगायतले शुभकामना मन्तव्य व्यक्त गरेका थिए ।