आफु पढेको विद्यालयलाई रकम हस्तान्तरण

बागलुङ, ३ कात्तिक – जिल्लाकै पुरानो विद्यामन्दिर उमाविको भवन निर्माणका लागि बुधबारदेखि शुरु हुन लागेको महायज्ञको पूर्वसन्ध्यामा २०३४ एसएलसी उत्तिर्ण व्याजका दुई जना विद्यार्थीहरुले सहयोग रकम मंगलबार हस्तान्तरण गरेका छन् ।
भूकम्पबाट क्षतिग्रस्त विद्यामन्दिर उमाविको पुनःनिर्माण अभियानका लागि धौलागिरी अञ्चल अस्पतालका सुपरिटेन्डेन तथा विद्यालयका पूर्वविद्यार्थी सागर राजभण्डारी र नेपाल रेडक्रस सोसाईटी बागलुङ शाखाका उपाध्यक्ष एवं पूर्वविद्यार्थी राजेन्द्रराज आचार्यले जनही १ लाख २३ हजार ४ सय ५७ रुपैयाँ ७८ पैसाँको चेक महायज्ञ मुल आयोजक समितिका अध्यक्ष लालचन्द्र राजभण्डारीलाई हस्तान्तरण गरेका थिए ।
रकम हस्तान्तरणपछि बोल्दै पूर्वविद्यार्थी राजभण्डारीले माला र सम्मानको लागि महायज्ञमा दानदिने घोषणा गर्ने र पछि रकम नदिने गरेको भन्दै आफुहरुले विद्यालयबाट कुनै सम्मानको लागि नभई विद्यालयको विकासको लागि महायज्ञ सुरु हुनुभन्दा पहिलेनै रकम हस्तान्तरण गरेको बताएका थिए ।
यस्तै आचार्यले विद्यामन्दिरमा पढेर आफुहरु सरकारी अफिसर बनेको स्मरण गर्दै विद्यालयलाई केही सहयोग गर्नुपर्ने भावनाले नै सहयोग गरेको बताएका थिए । उनीहरुले उक्त अवसरमा विद्यालयले बनाउन लागेको २५ कोठे भवनको एक कोठा २०३४ सालका एसएलसी उत्तिर्ण व्याजका विद्यार्थीहरुले बनाइदिने घोषणा गरेका छन् ।
यसैगरी, विद्यालयले आयोजना गरेको कालीगण्डकी बागलुङ कालिका धार्मिक तथा शैक्षिक महोत्सव, विद्यामन्दिर धनधान्याचल श्रीमद्भागवत सप्ताह ज्ञान महायज्ञ आजदेखि शुरु हुँदैछ । पहिलो दिन कालीगण्डकी नदीबाट २ हजार १ सय कलशबाट जल ल्याएर कलश यात्रा गर्ने कार्यक्रम छ । बुधबारदेखि महायज्ञको मुल समारोह संचालन हुनेछ ।
महायज्ञको लागि हालसम्म १ करोड भन्दा बढी रकम संकलन भईसकेको विद्यालयले जनाएको छ । दुइ महिना अघिनै भवनको शिलान्यास भैसकेकाले सहयोगीहरु धमाधम आइरहेका छन् । विद्यामन्दिर उमाविले १२ लाख ५० हजार रुपैयाँ दान गर्नेलाई उनीहरुकै इच्छा अनुसार कक्षा कोठाको नामाकरण गर्न दिने व्यवस्था गरेपछि सहयोगी आएका हुन् ।
विसं १९९७ सालमा स्थापना भएको यो विद्यालयले हाल उमावि तर्फ शिक्षा, विज्ञान, व्यवस्थापन र मानविकी संकायमा पढाई संचालन गर्दै आएको छ । विद्यालयमा हाल सबै संकाय र मावि तहमा गरी १ हजार २ सय ९७ विद्यार्थी अध्ययनरत छन् । उक्त भवन निर्माणका लागि प्रदिप शेरचनले ठेक्का लिइसकेको उमावि तर्फका संयोजक डिल्लीराज गौतमले बताए ।
विद्यालयले यो महाअभियान सकेपछि उमावि तर्फको पूर्वाधार सुधार, पक्की छात्रावास निर्माण तथा गुणस्तर सुधार अभियानलाई पनि अगाडि बढाउने लक्ष राखेको छ ।