‘मुदिर’ उपन्यासबारे बागलुङमा चर्चा

बागलुङ, ३ कात्तिक – आख्यानकार मिनराज बसन्तको कृति ‘मुदिर’ उपन्यासबारे बागलुङमा बहस तथा छलफल भएको छ ।
नयाँ साँस्कृतिक आन्दोलनको आयोजनामा कृतिकार, टिप्पणीकार, पत्रकार र अन्य साहित्यकारको जमघटमा यस्तो बहस भएको हो । मंगलबार आयोजित कार्यक्रममा कृतिकार बसन्तले खाडी मुलुकमा बसेका आम नेपालीको दुःखको कथालाइ उपन्यासमा उतारेको बताए ।
प्रचण्ड गर्मीमा त्यहा काम गर्ने नेपालीको दुखान्त कथा, त्यसमा पनि साहुले हेप्ने प्रवृत्ति र खान समेत नपाएर नेपालीहरुले भोग्नुपर्ने पिडा बारे उपन्यास लेखिएको उनले बताए । आफै बैदेशिक रोजगारीमा गएका बसन्तले रेमिट्यान्स आएको मात्र देख्ने आम नेपाली र अभिभावकलाइ युवाहरुले रगत र पसिनासंग साटेको पैसा बारेमा उपन्यासमा देखाउन खोजेको टिप्पणीकार तथा आख्यानकार भूपिन व्याकुलले बताए ।
उक्त उपन्यासको पाण्डुलिपी अध्ययन गरेर प्रमुख टिप्पणी लेखिदिने पनि भूपिन हुन् । कार्यक्रममा भूपिनले लेखक मिनराज बसन्त कवि भएपनि पहिलो पटक कृतिको रुपमा आख्यान आएकोले बहुप्रतिभा भएको समेत बताए ।
उनले मुदिरमा पूर्वि पहाडको राइ पात्रको कथा लेखिएको राम्रो मान्दै आगामी दिनमा धौलागिरी क्षेत्रको पनि कथा लेख्ने प्रयास गर्न आग्रह गरे । कृतिकारकै हस्ताक्षरमा उपन्यास विक्रि गर्ने, पाठकमा आएका जिज्ञाशा समाधान गर्ने लक्षले आन्दोलनले साक्षातकार कार्यक्रम राखेको थियो ।
बसन्त केही बर्ष अघि देखि ढोरपाटन दैनिकका नियमित स्तम्भ लेखक पनि हुन् ।
नयाँ सास्कृतिक आन्दोलनका अध्यक्ष मुकेशचन्द्र राजभण्डारीको अध्यक्षता, दिल शिरिषको संचालन र राम थापा अविरलको स्वागतमा सम्पन्न कार्यक्रममा प्राज्ञ प्रेम छोटा, पत्रकार महासंघका केन्द्रीय सदस्य हरिनारायण गौतम, मुक्तिक्षेत्र दैनिकका सम्पादक धनराज सापकोटा, धौलागिरी बहुमुखी क्याम्पसका सह प्राध्यापक हरिप्रसाद पाण्डेय लगायतले उपन्यासको बिषय बस्तु तथा लेखन बारे सुझाव र टिप्पणी प्रस्तुत गरेका थिए ।
लेखक बसन्तले रचनागर्भको अवस्था र आगामी दिनमा आफ्नो योजना बारेमा पनि बोलेका थिए ।