कृष्ण कँडेल
बागलुङ, १ कात्तिक – जिल्लाको बुर्तिबाङ क्षेत्रका स्थानियले आफ्नो गाउँमा क्याम्पस सञ्चालनका लागि भवन निर्माण गर्न झण्डै १ करोड आर्थिक सहयोग गरेका छन् । जिल्लाको दुर्गम ठाउँमा पर्ने निसीभुजी जनाता क्याम्पस सञ्चालनको लागि भवन अभाव भएपछि स्थानियले ९२ लाख रुपैयाँ आर्थिक सहयोग गरेको क्याम्पस व्यवस्थान समितिका अध्यक्ष धिरप्रतापसिंहले जानकारी दिए ।
क्याम्पसको १२ कोठे भवन सम्पन्न गर्नको लागि क्यम्पस व्यवस्थापन समितिका उपाध्यक्ष बुर्तिबाङ–१ का तुलसीराम अर्याल तथा बुर्तिबाङ–१ स्थायी घर भई हाल काठमाण्डौ बस्ने अर्जुन मल्ल, बुर्तिबाङ–१ कै हर्कबहादुर गुरुङ र शोभाखर खनालले १४÷१४ लाख रुपैयाँ सहयोग गरेका छन् । यसैगरी, निसी–३ घर भई हाल काठमाण्डौ बस्ने कृष्ण पुन र नरेश पुनले आफ्ना स्वार्गीय आमा धनकुमारी पुनको स्मृतिमा संयुक्त रुपमा १४ लाख सहयोग गरेका छन् । बुर्तिबाङ–१ का स्वर्गीय भागिरथ खरेलको स्मृतिमा उनका श्रीमती मनकुमारी खरेलले ७ लाख नगद प्रदान गरेको क्यम्पस प्रमुख कृष्णकान्त आचार्य जानकारी दिए ।
क्याम्पस भवन निर्माणका लागि १५ हजारदेखि १ लाख २५ हजार रुपैयाँ दिने सहयोगदाता १ सय ५० जनाभन्दा धेरै छन् । सहयोगदाताबाट संकलन भएको ९२ लाख र विश्वविद्यालय अनुदान आयोग, निर्वाचन क्षेत्र विकास कोष तथा शान्ति मन्त्रालयको अनुदान २८ लाखसहित १ करोड २० लाख जुटाएर क्याम्पसको भवन निर्माण कार्य चालिरहको छ । निर्माणाधिन १२ कोठे भवन सम्पन्न गर्न २ करोड ५० लाख चाहिने भएपनि अझै १ करोड ३० लाख रुपैयाँ नपुग रहेको छ । नपुग रकम सरकारी अनुदान तथा चन्दा सहयोगबाटै जुटाउने गरि काम भईरहको सहयोगदाता समेत रहेका क्याम्पस व्यवस्थान समितिका उपाध्यक्ष तुलसीराम अर्यालले जानकारी दिए ।
१२ कोठे भवनको निर्माण कार्य पुरा भएपनि रङरोगन, झ्याल ढोका लगायतका फिनिसिङको काम बाँकी रहेको अर्यालको भनाई छ । क्यम्पसको प्रत्येक तलामा छात्रामैत्री शौचालय, पानीको व्यवस्थासहित नयाँ भवन निर्माण भएका छन् । भवन निर्माणको लागि क्याम्पस व्यवस्थापन समितिले ३ सय ३० रुपैयाँ प्रतिस्क्वाएर फुटमा निर्माण व्यवसायी सुरेश पटेललाई जिम्मा दिएको थियो ।
क्याम्पसमा अध्ययनका लागि बागलुङको बुर्तिबाङ क्षेत्रका २० गाविस तथा गुल्मी, प्युठान र रुकुमबाट समेत विद्यार्थी आउने गरेका छन् । स्नातक तहमा बिएड, बिबिएस र बिएको पढाई हुने निसीभुजी क्याम्पसबाट प्रत्येक बर्ष ५ सयदेखि ६ सय विद्यार्थीले परिक्षा दिने गरेका छन् ।
